Penanggul ai patut diputar lengkas

BELAGA: Penanggul suntuk bekal ai ti suah ditapi mensia mayuh di pelilih menua tu udah ditemu lalu deka diputarka enggau lengkas.

Kaban Kunsil Nengeri (Adun) Murum, Kennedy Chuk Pai Ugon madahka, penanggul tu nyadi ketegal mayuh bumbus paip ti ngujung ke ai tebasau.

“Mayuh amat paip bumbus ke udah ditemu kitai, lalu minta mensia mayuh di menua tu (Belaga) ke bisi nemu penanggul tu madah ngagai Opis Bekal Ai Menua Pesisir (JBALB),” ku iya.

Iya mansut ke perkara itu rambau ke ngabas penganggul bekal ai di menua nya begulai enggau raban ari Opis Bekal Ai Menua Pesisir (JBALB) di genturung pendiau ba Skim Gempuru Bakun, ke empai lama.

Endur ke di lawa sida bekaul enggau penggul bekal ai ianya ba SMK Bakun, SK Batu Keling, Klinik Kesihatan Sg. Asap enggau SK Long Gang nyengkaum Tangki Nyimpan Ai Sungai Asap.

“Minta mensia mayuh di menua tu lebih bejimat lebuh ngena ai lalu sema bisi paip bumbus tauka pechah patut diadu sereta putar enggau lengkas,” ku iya.

Berebak enggau nya, iya nangkan ni bagi paip ke bisi bumbus sebedau ngelawa meter ai tau dipadahka ngagai Opis JBALB laban nya sigi tanggung pengawa sida.

Penemuai Kennedy Chuk Pai ke ngabas penanggul bekal ai di menua nya disempulang Sapit Direktor Operasi Mejar (B) Ahmad Salihin Bin Che Said, Injinir Bagi Ai JBALB Bintulu, Lai Kien Hong enggau raban kontraktor.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak