Selampur Saribas bisi bekal ai asil pengeransing Razi

BETONG: Dun Saribas diatu nyadi sitak menua pesisir keterubah di Sarawak ti mujur nerima bekal ai 100 peratus lebuh penemu projek Bekal Ai Menua Pesisir (BALB) ari Kampung Mangut ngagai Kampung Medang, Supa, Tuie enggau Serabang.

Menteri Muda Utiliti (Bekal Ai) Datuk Dr. Abdul Rahman Junaidi madah, projek tu nunjukka ketuai Sarawak enggau naka ulih meri pemansang enggau pekara diguna rayat.

Ku iya, projek nya berengkah dipejalai dalam taun 2017 ti chukup besejarah.

“Meri pengaga ari ngagai Adun Saribas Mohammad Razi Sitam ti udah gawa bebendar nyendiaka perengkaguna ngagai semua sitak ba Saribas.

“Sitak menua pesisir enda ulih ngerumban pejalai projek tauka perengkaguna baka dikedeka kitai enti nadai pengari rayat ti mantaika projek tu nyentuk ulih dipejalai ba sebengkah menua.

“Tang, aku beratika Razi enda kala tinggal mantaika peminta ngagai perintah lebuh bisi aum besai Dun.

“Iya keran nentuka perengkaguna pemun ungkup pengelantang rayat ulih disedia kelebih agi bekal elektrik enggau bekal ai,” terang Abdul Rahman.

Iya ti mega Menteri Muda ba Opis Kepala Menteri (Pekara Islam enggau DBKU) mansutka jaku nya ba Pengawa Makai Selamat beserimbai enggau penembu projek BALB ngagai empat genturung pendiau ba Tuie, ditu kemari.

Iya mega muji chara Razi gawa lalu semua peranak ba Dun Saribas mega meri besai terima kasih ngagai iya laban udah bejalaika mayuh projek kelebih agi nyendiaka bekal ai enggau elektrik.

Ngelansa silik, Abdul Rahman ngarapka JBABL ulih mutarka penanggul enggau naka pengelengkas nengah kerejasama peranak dia.

Ku iya, bekal ai beresi ba Sarawak diatu udah nyapai 81.4 peratus ba selampur menua di Sarawak ditu.

“Pekara tu nunjukka agi mayuh sitak bedau nerima bekal ai kelebih agi peranak ke diau jauh ba menua ulu.

“Ba mengeri, pengawa nyendiaka bekal ai beresi udah nyapai 99 peratus enti dibanding menua pesisir ke baru nyapai 68 peratus.

“Nya kebuah, Opis Menteri Utiliti enggau ejensi dipegai iya meseri keran enggau fokus laban agi mayuh kereja meseti dipejalai nentuka kitai ulih nambahka 19 peratus ngambi nyapai tagit 100 peratus manggai taun 2025,” terang iya silik agi.

Projek BALB ari Kampung Mangut ngagai Kampung Medang, Supa, Tuie enggau Serabang beungkus lebih RM20.9 juta dipejalai kunteriktor BWS Engineering Sdn. Bhd. enggau penyanding penemu Perunding Iriz sereta Azmar Engineering Sdn. Bhd.

Projek tu nyengkaum nyambung paip 355mm HDPE, 225mm HDPE, 160mm HDPE kelimpah ngaga siti tong tinggi ulih ngundan 3,000,000 liter enggau tong ai 800,000 liter sereta sebuah rumah mansutka peneras ai nyengkaum nyambung 1,160 meter air.

Berebak enggau nya, iya mega bekunsika inisiatif Perintah Sarawak ti deka bejalaika Skim Ai Pechuma berengkah taun tu.

Ku iya, skim tu deka meri pemaik ngagai lebih 600, 000 peranak Sarawak enggau Perintah ngena belanja RM40 juta setaun ungkup inisiatif nya.

Suara Sarawak