Semua genturung pendiau deka terus dikemansang

ENGKILILI: Kaban Kunsil Nengeri (Adun) Engkili Dr Johnical Rayong Ngipa deka terus ransing ngemansangka semua genturung pendiau ba sitak Dun ke dipegai iya.

Ku iya, pengawa iya nya endang semampai dikemerat sepanjai maya.

“Kitai sigi enda ninggalka ni-ni genturung pendiau ditu (Dun Engkilili) laban semua sitak endang patut ngasaika pemansang.

“Nya alai, bepun ari pengeransing tu, aku naka alah ngiga penatai dikena ngaduka pemansang ba dun Engkilili,” pia ku iya madah maya Pengerami Nasih Tanah Rumah Ulan Lampong, Pentik Penyuan di Skrang, pagi tadi.

Iya ti mega Ketuai Raban Nembiak Parti Sarawak Bersatu (PSB) madahka parti nya siti parti ti ngemeratka hak rayat nengeri Sarawak.

“Ke diatu kitai ngarapka rayat besabar nganti pemansang datai.

“Kebuah pia laban ukai semina ngetanka hak rayat, PSB mega parti ti ransing numbuhka pemansang ungkup penyenang enggau pengelantang rayat,” ku iya.

Rayong maya tu madah, rayat tau enda kakang ati ngetanka sukung ngagai iya maya Pengawa Bepilih Nengeri (PRN) ti deka datai laban rayat empu tau meda nama bagi pengawa ke udah diaduka iya ba Dun nya ngelama tu.

“Ketegal ari sukung kita aku ulih mai pemansang ba Dun tu lalu pia mega ngarapka sukung kita mengkang ba aku ngambi pemansang ditu ulih ditambah mayuh agi,” ku iya.

Ba pengerami nya, Rayong bisi nyuaka bantu RM3,000 bela ngagai Komiti Pemansang enggau Pengelikun Genturung Pendiau (JKKK) enggau Biro Indu Rumah Ulan.

Sama bela datai maya tu iya nya Penghulu Skim Skrang Betok Tubi.

Suara Sarawak