KUCHING: Ketuai Besai Pakatan Harapan (PH), Datuk Seri Anwar Ibrahim enda ngenadaika pasal randau penyikap ungkup Pengawa Bepilih Besai Nengeri (PRN) ke deka diatur beserimbai enggau penemuai iya ngagai nengeri tu, pagi tadi.

Kenu ku iya, penyikap dikena napi PRN entara isu ke dikerandau enggau sekeda ketuai PH Sarawak.

“Kitai deka fokus penuh enggau bekerejasama ungkup PRN Sarawak.

“Kitai chukup tegap ba Sarawak lalu aku meri terima kasih ngagai iring Chong (Chairman PH Sarawak, Chong Chieng Jen) enggau tim iya,” ku iya.

Iya madah munyi nya ngagai pemberita pengudah pengerami merarau Taun Baru China diatur PH Sarawak ba sebuah restauran ditu, pagi tadi.

Tandu Anwar, tim ke diiring Chieng Jen diperati fokus napi PRN.

Ungkup penemu, timpuh Kunsil Nengeri (Dun) Sarawak abis iya nya tengan taun 2021.

Lebuh dirandau pasal kuing tauka sebarang ubah kabinet pengudah dipadu nyadi Menteri Besai ila, Anwar enggai nerang silik.

“Awakka aku nyadi Menteri Besai dulu, udah nya baru tanya kita (pemberita) ulih disaut,” ku iya pandak.