SIBU: Dalam gerempung, endang nadai gaji laban iya dikumbai pengawa volunteer. Taja pia pemaik iya chukup besai laban semua kitai ulih ngelala pangan diri dikena nanggam pemanah kaul, pia ku lalau Presiden Sarakup Indu Dayak Sarawak (SIDS) Datuk Ir Alice Jawan.

Nya alai, Alice meransang kaban SIDS bebendar agi ngereja pengawa lalu nyukung perintah nengeri ke udah mayuh mayuh raban indu Dayak di Sarawak.

“Mayuh bantu udah diberi perintah nengeri ungkup pemansang SIDS.

“Penyampau semua bantu ke udah diberi perintah ngagai SIDS manggai Rm6.7 juta ungkup mayuh bengkah tuju ke pemaik semua kitai (indu).

“Entara nya dikena mantu kitai meli dua unit blok kedai berega RM1.8 juta ke lalu nyadi Rumah SIDS, belanja dikena numbuhka Kursi Pansik Indu Dayak Tan Sri Empiang Jabu (TSEJ) enggau mayuh guna bukai ungkup pemansang raban indu Dayak,” ku iya rambau Aum Besai Ninting Taun (AGM) SIDS Sibu Ke-28 ba Dewan Suarah Sibu ditu kemari.

Berebak enggau nya, SIDS Sibu bisi ngumpul turu dikena mantu siku indu ke mega kaban SIDS ke udah lenyau rumah ketegal penusah angus di Sri Aman apin lama ke udah.

Sama datai Penyanding Penemu SIDS Sibu Catherine Nain Abit, Chairperson SIDS Sibu Angelyn Uchi Maseng, Sapit Chairperson SIDS Sibu Tuai Rumah Monica Giri, Sekretari SIDS Sibu Michelle Hildalyne Anthony Luta sereta kaban exco bukai.

Alice ke mega Penyanding Penemu SIDS Sibu meri terima kasih ngagai perintah nengeri laban ke udah mayuh mantu SIDS.

Iya madah, sekumbang dibaruh iring iya SIDS balat fokus ngagai empat pekara berat iya nya pelajar, negapka orang indu, ngemansangka main asal Dayak enggau modal mensia indu Dayak.

Nangkan nya, Alice madah SIDS deka muka laman web dikena ngemuntang pedagang indu Dayak ngelakuka produk sida.

Tu beguna ngambika indu Dayak ke bisi pengelandik ngaga kraf ulih ngelakuka produk diri ngagai serata dunya.

“Pengawa nguna teknologi diatu beguna amay lebih agi ungkup pedagang ti deka ngelakuka produk diri empu,” ku iya.

Ungkup penemu, penyampau kaban SIDS Sibu naka tu bisi 1,528 iku.