NGENA rintai jurai leka jaku ngading penyiru, dialun ngena sada nyawa main lagu, besugi ke enteli sera sebana, bejawang ke timang gerena mensia, dilagu ke raban nembiak rebak baru ngena timang jaku kenang Iban dalam.

Nya gaya munyi penyelai ubah lagu main baru ti deka dikenang kitai dalam ruai pemerindang ke minggu tu.
Radiant Music Studio tu betuai ke siku nembiak Dayak Bidayuh benama Denn Al asal ari menua Siburan, Kuching, tang diatu diau mendam di Miri.

Ditumbuh dalam taun 2018, begulai enggau seraban nembiak betubuh lima iku, nembiak Dayak Dban ti bisi pengelandik dalam nebah perengka musik sereta belagu.

Sebedau iya numbuh ke Radiant Music Studio (RMS), iya bisi peneleba ngaga tiun bunyi lagu, ngubah tiun lagu, lalu mega kala ngerikod lagu rohani begulai enggau kompeni bukai.

Laban ti nadai puku dia raban tu sida bisi tejanggal maya deka ngeluar ka album.

ARTIS RMS…Raban Eagle Crown entara artis baru ti diangkatka RMS.

Tang seninjik bendar, dalam pun taun 2019 sida tetemu ke siti kompeni ti nyanggup nyadi perabung kompeni sida.
Kompeni tu di kelala ngena nama Tjksb Music Production ti diempu siku indu Dayak Orang Ulu (Kenyah Berawan) ari Sungai Apuh, Baram di Miri.

Sebengkah agi raban tetap sida Radiant Music Studio tu iya nya seraban indu dara betubuh lima iku.
Album single keterubah sida ‘Asa Belala’ ari Eagle Crown enggau ‘Pesaka Ati’ ari Mogen Band dikeluar kena 8 Mei 2019.

Album ‘Enda Ngipak’ Eagle Crown, ‘single’ ti ketiga keluar kena 25 September 2019 lalu ditangkan ‘Bebalai Rumput Mati’ ari Mogen Band kena 31 Oktober 2019.

Lagu ‘Betengap Ke Nuan’ ari Eagle Crown diatu benung nganti hari dikeluarka aja.
Diatu sida benung ngerikod lagu Gawai ti nyelai ari lagu Gawai ke udah dikeluar ke kompeni bukai ari gaya tusun cherita.

Tu baka lagu ‘Begawai Ba Sapital’ ari Brandon Mogen enggau lagu begulai duet ‘Penyangkai Di Hari Gawai’ di bai Brandon Mogen bepadu nyawa enggau Mang Victoria Eagle Crown.

Ngelansa mimit ngenang cherita raban nembiak penebah kereban musik ari Mogen Band tu. Ditumbuh urung taun 2015, sepengudah udah tembu ngambi peresa SPM dalam taun nya.

Sida betubuh lima iku, empat iku Iban chulin lalu siku Dayak Bidayuh.

Band sida bisi ngetu enda lama laban empat iku ari sida nyambung belajar ngagai palan pelajar tinggi sebedau chakah baru sepenembu belajar dalam ujung taun 2018.

Raban tu betuai ke Brandon ti mega nyadi penanyi sida (vocalist) Den Al (keyboardist), Adrian (bassist), Ashmore (guitarist) enggau Ryan (drummer). Sida tu penanyi enggau band tetap TJKSB Music Production.
Eagle Crown, sebengkah ari raban tetap TJKSB Music Production, betubuh lima iku, betuaika Victoria, Andinie, Amel Tijan, Cindy enggau Dee Nang.

Sida lima tu bisi peneleba dalam dunya pemerindang (betanda/belagu) kenyau ari sekula sekondri. Semua sida diau mendam di Miri magang.

Berebak enggau nya, Uncle Lih Achop tauka nama amat iya Ensalih Achop Entu, datai ari Rumah Entu, Kelampo, Engkilili diatu diau mendam di Miri.

Bisi dikangau ke sida apai ari Radiant Music Studio laban nyadi ke tulang belakang sereta penyanding penemu sida.
Iya tu meh penengkebang leka lagu ke sida iya. Iya mega siku pengarang jurai rambai Jaku Pelandai ba lambar Ruai, Suara Sarawak.

Siku ari tuai kitai bansa Iban ti agi belandik bekena ke jaku Iban dalam belangkung karung ngena leka jaku ti engkeman.

Nya alai leka lagu ti ditengkebang iya nyau deka semua ngena Jaku Pelandai (puisi).

Iya ukai semina nurai cherita bujang dara ti benung berambang tang mega ngading ulah mensia enggau menua ngena Jaku Silup.

Ambika banding baka lagu ‘Pesaka Ati’ ti ke bendar iya ensera dalam lagu tu nyerita ke penyiru apai indai ninggu anak ari ada sampai besai tuai.

Enti kitai berati ke leka lagu tengkebang iya, ukai semina ke siul mulut nyadi pemerindang, tang mega nyadi ke penemu pelajar dalam ngena jaku iban dalam ti engkeman, ngambi ke penyiru jaku kitai bansa enda punas di taban arus dunya pemansang.

Ari cherita di atas, kompeni Radiant Music Studio di baruh perabung TJKSB Music Production tau disebut berani ngubah penyelai ari kompeni orang bukai ke bela ngeluar lagu Iban ari tusun leka.