KUCHING: Sebuah palan pemanah ulah sida ke kala gian dadah disadang deka ditumbuhka ba menua utara Sarawak.

Ketuai Direktor Ejensi Anti Dadah Nasional (AADK) Datuk Seri Zulkifli Abdullah madahka diatu sida benung meratika siti endur di Bintulu tauka Miri alai sida ulih numbuhka palan tu.

“Kami deka berandau enggau Perintah Sarawak ngambika kami ulih numbuhka palan tu ba utara Sarawak.
“Kebuah pia laban Sarawak tu siti menua ti besai, lalu enti deka ngarapka sida ke jauh datai ke Kuching nya begunaka pejalai ti jauh,” ku iya.

Zulkifli madah munyi nya lebuh dirandau pemberita pengudah matau pejalai projek Palan Serenti Puncak Borneo ditu, pagi tadi.

Nangkan nya ku iya, naka ke diatu sida semina ngena palan servis Cure And Care (CCRC) ba lima endur di Sarawak.

“Kami mega deka ngemanahka lima palan CCRC tu ngambika ulih mantu mimit sida ke ngembuan ulah salah ngena dadah.

“Lima palan tu ulih mantu sida ke ngembuan ulah salah ngena dadah ke baru tauka enda balat, tang enti kelalu balat, kitai begunaka sida dianjung ngagai palan ke besai agi,” ku iya nerang.

Berebak enggau nya, Zulkifli madahka pejalai projek ngaga Palan Serenti Puncak Borneo udah manggai 84 peratus lalu disadang deka tembu bulan April tu.

“Projek tu kebendar iya udah tujuh peratus laun ari timpuh penembu berindik kunteraktor ke dulu udah dikinsil ari tender laban enda ulih nembuka projek tu nitihka timpuh diungkupka ngagai sida.

“Nya alai kami ngarapka kunteraktor ke baru tu ulih nembuka projek tu nitihka timpuh,” ku iya seraya madah projek nya udah berengkah kenyau ari taun 2015.

Zulkifli mega madahka ba palan baru enggau pemesai 15 ikar nya ila mega nyendiaka servis ngagai sida ke deka ngemanahka ulah enggau volunter.

“Ba palan tu ulih ngungkupka urung 200 iku sida ke ditan enggau perintah kort, lalu 50 iku sida ke datai enggau volunter,” ku iya.

Bela ngiring pengawa matau nya Direktor AADK Sarawak Wan Madihi Wan Salleh enggau pengari ke bukai.