SIBU: Raban Gerempung Ukai Dikuasa Perintah (NGO) Dayak ngansak polisi ngambi bansa Pakistan gawa di menua tu patut diserenih baru Perintah Malaysia.

Ba penemu tujuh NGO Dayak nya, penyampau peranak luar gawa di menua tu majak nambah taja kitai nemu sida endang begunaka kereja ditu.

Gerempung Pemikir Dayak Sarawak (DTTAS), Kongress Nasional Dayak (DNC), Gerempung Iban Sarawak (PAIS), Harapan Orang Asal Sarawak (HOAS), Gerempung Hak Pendiau Orang Asal Sarawak (SCRIPS), Gerempung Balai Nyabong (BBN) enggau Gerempung Aum Besai Dayak Selangor (ABD) sepenemu ngansak Perintah Malaysia berundingka pekara nya sereta patut ngemeratka agi peranak menua tu empu diambi gawa.

“Chara menua kitai ngambi orang luar gawa agi baka chara lama. Kitai agi sepeneka ati ngemendarka sida gawa ditu tang nadai ngira peluang gawa ngagai rayat.

“Ni maya kitai ulih meda polisi ngemeratka ekonomi enggau orang gawa menua tu empu?” pia ku penerang ari lapan gerempung nya, tadi.

Sida mega madah, polisi ngambi orang menua bukai gawa balat nating menua kitai laban ekonomi enda ulih ngerembai enggau mansang lalu tu meri empas enda manah kelebih agi pekara nya bisi ngaul raban politik.

“Nya alai, mayuh peranak Malaysia gawa ke menua bukai laban gaji ditu enda chukup dikena tang raban pengaji beambi ulih ari pekara nya lalu ngaji orang luar gawa ngena gaji ke mit,” ku penerang nya.

Ba sukut, ‘Talent Crop’ ti digaga perintah sebedau tu mega nadai mai ubah dikena matak pulai rayat Malaysia ke gawa di menua bukai kelimpah ‘reverse brain drain’ ti suah dipetalat suba.

Ketegal nya, ‘Malaysia Baharu’ patut terit agi, mansik sereta ngenegapka agi industri orang gawa enggau chara numbuhka polisi ti engkeman ke ngira genap sukut pemansang.

Nya alai ba penemu sida, manah agi Pakatan Harapan ngemeratka rayat baka B40 nyendiaka pelajar ti tau meri sida penemu sereta ngangkatka tikas idup, nyungkak eknomi, ulih besemekih sereta nempa pemanah gawa.

Ba Sabah enggau Sarawak, penyampau tubuh orang menua bukai ke gawa ditu empai datai ba tikas kelalu mayuh enti sema raban pengaji enda kelalu ngira untung diri empu aja.

Gerempung Dayak tu diarika penengkebang DTTAS Wellie Henry Majang, presiden DTTAS Elias Lipi Mat, Paul Raja (DNC), Samuel Suring (PAIS), Leighton Manjah (HOAS), Micheal M Jok (SCRIPS), Mengga Mikui (BBN) enggau Luang Janbi Munan (ABD).