KUCHING: Mensia mayuh dilalau ngambika anang takut ngeripot penyalah ti bisi nyadi besemak enggau genturung pendiau sida ngagai piak polis.

Chairman MPP Lo Khere Chiang madah, diatu bisi mayuh chara dipejalai PDRM dikena munaska penyalah ba menua tu.

“Diatu, kitai udah bisi aplikasyen Volunteer Smartphone Patrol (VSP) ti ulih dikena sebarang maya enggau endur ngambi nyadi mata enggau pending polis.

“Nya kebuah, tanggungpengawa nagang penyalah ngagai bala komuniti nya tanggungpengawa semua piak,” terang iya.

Khere Chiang mansutka jaku nya lebuh bejadika Randau Pengelikun PDRM enggau MPP begulai enggau Komuniti ba Dewan Serbaguna Kampung Semeba ditu, pagi tadi.

Ku Khere Chiang, MPP mantu nyendiaka perengkaguna pemun baka lampu jalai enggau ke bukai kelebih agi ba ‘Black Spot’ dikena ngurangka penyalah nyadi.

“Pia mega, MPP mega bisi nyendiaka endur kompelen baka talian khidmat enggau Hotline Whatsapp pasal jalai ti nadai lampu enggau pekara bekaul.

“Nya alai, kitai ngarapka semua piak bekerejasama ngambika endur nya lantang sereta likun,” tandu iya.
Iya mega meri terima kasih ngagai PDRM laban udah bekerejasama enggau MPP ngatur randau nya.

Randau nya diatur kali kedua pengudah Kampung Haji Baki kena 9 Januari tu tadi ngambi ngelala penanggul ti nyadi, minta penemu peranak dia nyengkaum pengawa nagang penyalah ari nyadi ba menua tu.

Sama datai Sapit Ketuai Polis Pelilih Padawan DSP Lim Jaw Shyong, Sapit Chairman MPP Datuk Ahmad Datuk Seri Ibrahim, Penghulu Richard Laut Lumbin, Ketuai Genturung Pendiau Semeba Thomas Gown enggau bala bukai.