MURUM: Kerejasama entara perintah nengeri enggau perintah besai chukup beguna bendar dalam ngemansangka menua ulu kelimpah dikena nyungkak penatai pemisi rayat pesisir di menua tu.

Kaban Kunsil Negeri (Adun) Murum, Kennedy Chuk Pai Ugon madahka, tanggungpengawa ke badas ulih mai ubah ba penyamai sereta pengelantang pendiau pengidup rayat.

“Nengah kerejasama ke baka tu nyamai bendar begulai enggau sida ke gawa ba Opis Perintah ngaga perambu sereta ngemujurka pemansang ti udah dilanggur kelebih agi ba sitak Murum,” ku iya.

Chuk Pai mansutka jaku nya lebuh penemuai iya ba Program Jalai Menua Pesisir (JALB) Sarawak di menua nya kemari.

Berebak enggau nya, iya madah bisi empat iti taba projek ti dilawa sida nyengkaum Projek Ngemanah Jalai Batang ngelawa Genturung Gempuru di Tegulang, Projek Ngemanah Jalai Batang ngelawa Genturung Gempuru di Metalun, enggau Projek Ngemanah Jalai Lot Pertanian Genturung Gempuru Bakun.

Ku iya, penembu projek tu jemah deka meri mayuh pemaik ngagai rayat laban mantu nyungkak penatai pemisi sida di menua nya.