SIBU: Kaban Kunsil Nengeri (Adun) Tamin Christopher Gira Sambang udah ngelimpang diri ngabas sida ke tasah angus Rumah Dingun Megong di Dewan Serbaguna Sekuau, ditu kemari.

Pejalai Gira, disempulang Chairman Kaunsil Pelilih Mneua Pesisir Sibu (MDLBS) Kaunsilor Sempurai Petrus Ngelai, Pemancha Mathew Ganggang, Penghulu Augustine Anjat, Penghulu Surang Takin sereta bala kaunsilor bukai enggau bala tuai rumah.

Gira enggau raban iya mega ngabas tembawai angus nyadi enggau matau endur sida ngenduh ba Dewan Serbaguna Sekuau.

Lebuh betemu enggau sida ke tasah angus ba Dewan Serbaguna Sekuau, iya madahka diri deka minta belanja ari Perintah Sarawak kelimpah mantu peranak rumah panjai nya ngerataka taba ba sitak ti diperambu endur ngentak rumah panjai baru.

“Diatu, kitai deka fokus dulu ungkup pengawa ngaga dampa ke sida,” terang iya, ditu ensanus.

Gira mega madah, agu ba dampa nya mega deka ditambah ungkup pengelantang semua sida.

Pia mega, iya minta Opis Pengintu Pengelantang Komuniti (JKM) semampai mantu nyendiaka barang diguna nyengkaum pemakai enggau ai irup ngagai sida ke ngenduh ba dampa nya.

Berebak enggau nya, Gira meri besai terima kasih ngagai semua piak ke udah bela gerah jari nyuaka mayuh macham pemeri enggau tulung sida nyengkaum Gerempung Ukai Dikuasa Perintah (NGO).