LUBOK ANTU: Opis Pengerai Bagi Menua (PKB) Sri Aman deka matau aktiviti sida ke tama enggau pansu ba Kompleks Imigresyen, Kastam, Kuarantin enggau Pengelikun (ICQS) Lubok Antu ngambi nyeliah pengerekai igi penyakit Covid-19.

Pemesai iya, Dr. Euphrasia Bari madah bisi sekeda pemesai PKB diasuh gawa dia.

“Sida gawa ba Kompleks ICQS Lubok Antu ninting hari berengkah ari pukul 6 pagi nyentuk 6 lemai ngambi ngelala enggau meresa sida ke bisi simptom igi penyakit Covid-19 tu.

“Naka diatu, nadai orang ditemu bisi simptom virus nya, ku iya nerang.

Euphrasia mansutka jaku nya pengudah Program Info On Wheels Pengawa Nyadung Surat Penerang Covid-19 ba mua Sekula Bansa China (SJKC) Chung Hua Simanggang.

Taja pia ku iya, PKB deka seruran matau sida ke tama enggau pansut ari tu ngambi ngelala simptom igi penyakit tu.
Euphrasia mega madah, piak sida mega deka naburka isu nya nengah radio kelimpah ngatur program ngambi nagang pengerekai igi penyakit tu ba rumah panjai enggau sekula ditu.

Nambahka nya, Pemesai Pemadah Pelilih Sri Aman Muhammad Alwi madah, staf iya suah bejalai ngagai sitak mengeri enggau menua pesisir ngambi nyadung surat penerang bekaul virus nya kenyau tiga minggu ke udah.

“Pengawa tu dikena meri penerang silik ngagai komuniti pasal igi penyakit Covid-19 ti ngeruga pengerai mensia mayuh diatu.

“Kitai dekaka sida sedar enggau nyaga pengerai diri ari pengerekai igi penyakit nya,” terang iya silik.

“Nya kebuah, piak kami deka ngatur kerejasama enggau Komuniti Harapan Malaysia dikena ngemujurka pengawa nya.

Ba lansa bukai, bisi 30 lutur biak ari SJKC Chung Hua Simanggang ngambi bagi ba program nya lebuh sida sama nyadung penerang bekaul igi penyakit Covid-19 ngagai bala bakih enggau bala apai indai.

Sama datai Kepala Pengajar SJKC Chung Hua Simanggang Chin Kui Nam.