BAU: Pengempu tanah di baruh Seksyen 6 Kanun Tanah Negeri ba sitak Tasik Biru dipinta meri kerejasama ngagai piak Opis Tanah enggau Survei Sarawak ngambi ngerumban pengawa nyukat kelingi tanah sida.

Kaban Kunsil Nengeri (Adun) Tasik Biru, Dato Henry Harry Jinep madahka peranak anang irau enti tanah sida enda disukat laban nadai dipasuk ba Seksyen 6 Kanun Tanah Negeri.

“Anang irau enggau kesal ati laban hak ba tanah kita enda deka lenyau laban Perintah Sarawak semapai ngetanka tanah adat.

“Pengempu tanah mega tau ngasuh tanah sida disukat di baruh Program Nyukat Kelingi Tanah NCR Inisiatif Baru,” terang iya.

Harry mansutka jaku nya rambau Randau Besedia Pengawa Nyukat Lot Individu Bagi Seksyen 18 Kanun Tanah Negeri di Kampung Grogo, Bau ditu, kemari.

Nambahka nya, Harry nyemetak madah Perintah Sarawak semampai ngetanka hak rayat ba tanah sida nengah pengawa nyukat tanah hak adat bansa asal (NCR).

“Rayat meseti meretika pengawa nyukat tanah NCR ukai pekara baru laban udah dipejalai kenyau ari taun 1960-an,” terang Harry.

Ba lansa bukai, Harry madahka peranak ti bepenatai pemisi baruh RM3,500 patut ngerebut peluang nganjung peminta Rumah Spektra Permata ba sitak DUN Tasik Biru ti deka dipenyadi sehari tu.