SRI AMAN: Semua rayat meseti nemu pemansang ti dilanggur perintah nengah ketuai raban bansa ba genturung pendiau sida empu.

Menteri Muda Pengintu Pengelantang Komuniti Sarawak, Datuk Francis Harden Hollis madah rayat ti apin nemu pasal projek dipejalaika Perintah Sarawak patut diterang silik ngambika sida enda saru penemu.

Iya mansutka jaku nya ba Pengawa Bejadika Pengerami Makai Lemai di Golden City Restaurant, ditu apin lama ke udah.

Sepenyampau 800 iku nyereta Pengerami Makai lemai beserimbai enggau Taun Baru China 2002 Bagi Menua Sri Aman, ditu apin lama ke udah.

Dulu ari nya, Harden madahka pengerami tu diatur dikena ngerapitka agi kaul komuniti pupu bansa ba bagi menua nya.

“Pengerami baka tu sebagi ari chara kitai nempa kaul serakup entara komuniti dikena mai pemansang ba Simanggang.

“Nengah pengerami tu, komuniti ulih bekunsika penerang enggau pangan diri bekaul pemansang ke benung enggau deka dipejalaika Perintah Sarawak,” ku iya.

Harden mega beterima kasih ngagai piak pengatur iya nya Serakup Ketuai Komuniti (PKM) Raban Bansa China Bagi Menua Sri Aman enggau sida ke meri belanja kelai sukung ngemujurka program nya.

Ba lansa pekara bukai, pengerami nya dikena ngempit kaul entara raban komiti serakup nya.

Iya mega bisi ngemendarka agih belanja Projek Mit Pemansang Mneua Pesisir (MRP) ngagai gerempung Ketuai Komuniti Raban Bansa China Bagi Menua Sri Aman penyampau RM25,000.