SIBU: Kaban Parlimen Sibu, Oscar Ling Chai Yew udah bejalaika inisiatif nyadung majalah sains ngagai sekula ba Sibu, ditu kemari.

Inisiatif tu sebagi ari chara iya nerenak ulah nembiak rinduka subjek Sains.

Pia mega, SJK Methodist (M) Sibu nyadi sekula kererubah nerima majalah nya lalu pengawa tu deka ditampung ba sekula bukai ngelingi Sibu.

Oscar lebuh dirandau pemberita nerangka nya inisiatif Palan servis iya taun tu enggau Perintah meransang bala nembiak rindu belajar ba bidang Sains.

“Pekara tu mega sebagi ari chara perintah ngemansangka Revolusyen Industri 4.0 (IR 4.0) enggau inisiatif ari aku empu, baka nyadung majalah ngambi meransang nembiak rindu belajar enggau ngaul diri ba bidang Sains,” terang iya ba Pengawa Nyadung Majalah nya.

Terang Oscar, Methodist nya sekula keterubah ti ngembuan dua pelajar iya nya pelajar china enggau pelajar perintah.

“Nya kebuah, majalah tu bisi digaga dalam dua jaku iya nya Jaku China enggau Jaku English ke alai Jaku English deka disadung ngagai pelajar perintahenggau Jaku China deka disadung ngagai pelajar China.

Bup tu ngembuan tiga renggat lalu semua kelas enggau sekula ba sitak aku deka nerima siti majalah.

“Nengah pengawa nyadung majalah tu, dikearap ulih mantu nembiak rindu belajarka subjek Sains,” terang iya.

Kelimpah ari nya ku iya, bisi 24 Sekula Perintah (C) enggau 11 Sekula Primari (SK) ba Parlimen Sibu deka disadung majalah nya.