BALINGIAN: Rayat dilalau anang mudah arapka jaku petenah ti dikena orang luar bejai Perintah Sarawak dipegai Gempung Parti Sarawak (GPS) sereta bala ketuai parti nya.

Sapit Kepala Menteri Datuk Amar Douglas Uggah Embas madahka pekara nya semina deka ngemaruhka GPS enggau raban parti nya.

“Ambika chunto, siku ketuai parti penyakal ba bulan Jun 2019 kala madah Sarawak deka bankrap dalam kandang tiga taun ketegal atur belanja ekonomi ti lemi.

“Taja pia, Menteri Besai Tun Dr Mahathir Mohamad meri tabi puji ngagai kitai laban udah ngatur nengeri kitai enggau manah lalu meransang bala pemeranak puku luar meranakka puku sida di Sarawak,” ku iya.

Uggah madah munyi nya lebuh bejaku ba program Opis Betanam Betupi begulai enggau komuniti di Rumah Gansu Antas, Sungai Arip ti digulu urung 600 iku orang enggau 73 iku tuai rumah ditu, kemari.

Nangkan nya ku iya, siti agi pekara bula dikena nyalahka perintah dipegai GPS iya nya pasal Perintah Sarawak deka ngambi tanah Hak Adat Bumiputera (NCR) nengah Seksyen 6 Kanun Tanah Negeri.

“Sida pengari parti penyakal madahka tanah NCR ke dikena ungkup projek pemansang nadai dibayar pampas.

“Tu siti pekara ti salah sereta bula laban kita ulih nanya penerang pasal pekara tu ngagai Opis Tanah enggau Survei,” ku iya madah nyemetak.