KUCHING: Dua kes baru Orang Agi Diperesa (PUI) Covid-19 dirikod ba Sarawak kemari.

Nitihka penerang ari Komiti Penyangga Penusah Ngenyit Nengeri (JPBN), siti ari kes nya dirikod ba Sepital Besai Sarawak lalu siti agi ba Sepital Miri ngaul peranak Malaysia empu.

Berindik ari nya, Sarawak diatu ngerikod 99 kes PUI kenyau ari 10 Januari ngagai 19 Februari.

Ari penyampau nya, bisi 76 iku peranak Malaysia, 20 peranak menu China lalu tiga agi peranak Thailand, Indonesia enggau Kanada.

Taja pia, bisi 92 kes nya udah ditemu negatif lalu tujuh agi nganti pemutus ari makmal.

Naka pukul 12 tengahari 18 Februari, Opis Pengerai Nengeri Sarawak (JPNS) udah meresa 11,761 iku orang ti datai ari mayuh bengkah pintu penama sekalika ba padang bilun, jalai darat enggau penyangkai kapal.

Penyampau tubuh sida ti diperesa manggai 131,292 kenyau ari 1 Februari tu tadi.