BERINDIK ari juluk ati deka ngangkatka pisin Pua Kumbu sebaka enggau bansa ukir bukai, Mizta enggau Augtine mujur nyadi penengkebang pisin tebilang ba menua tu.

Pemungkal M.O Couture & Wedding Sarawak, Mizta tu asal ari Sekuau mega mangku pengawa nyadi Chairman Gerempung Bakat Dayak, Pengatur Pengawa Malam Gala M.O Sarawak, Pengatur Pengawa The Face M.O Sarawak (Model Search, Kumang & Keling), Penyanding Penemu Senior Neraja Iban Fashion Magazine, Direktor Miss Grand Bintulu 2018, Direktor Miss Grand Kuching 2018 enggau Pengatur Begulai Kumang Kanowit 2017.

Augtine Das Basih tu asal ari Saratok enggau Pemungkal Begulai M.O Sarawak, Tukang Wang Gerempung Bakat Dayak Sarikei enggau Pengatur Begulai Malam Gala M.0 Sarawak.

Asat Nawin tauka tampak agi dikanggau Mizta madahka diri deka sereta keran ngangkatka pisin pua kumbu tu ngambika dikelala enggau dikerindu rebak biak.

Nya alai seduai nguji mantai ngagai pengemeran pisin ba Sarawak enggau Malaysia laban menua kitai mega ngembuan mayuh asil kraf enggau tenun ti berega lalu patut dikelaku ngagai renggat ke tinggi agi ba pua kumbu nya empu.

MALAM GALA… Mizta enggau Ostine begambar kenang enggau Menteri Muda Lumba enggau Main, Datuk Snowdan Lawan disempulang bala bukai ba Pnegerami Malam Gala M.O Sarawak Ke-9.

Ari nya, M.O Sarawak nengkebang pisin pekayan ari kain pua kumbu baka gaun bemacham gaya, kerepai, sari enggau ke bukai ngambika ukir pua kumbu diterima mensia mayuh ba selampur menua.

Pekayan ditengkebang ari pua kumbu seduai tu udah rembus ngagai makit entarabansa baka Indonesia, Poland enggau United Kingdom.

MAYUH GUNA

Pua Kumbu endang tebilang ba raban bansa Iban ba Sarawak lalu ngembuan mayuh guna baka digaga nyadi pekayan, kerepai, baju lelaki enggau ke bukai.

Mizta madahka iya berengkah bisi ati ngaul diri ba dunya pisin Pua Kumbu lebuh iya nyereta Pekit Piala Seri Endon 2009 ba Kuala Lumpur enggau dirintai ba Penuduk 30 pemadu atas dalam Pekayan Batik.

“Berebak enggau aku, aku empu endang rinduka bidang pisin lalu milih pua kumbu nyadi ukir besai ba semua baju ti ditengkebang kami duai,” terang Mizta.

PISIN MODEN… Miss World Malaysia 2018, Larissa Ping ngena sekeda ari pisin pekayan pua kumbu.

“Kebuah pia laban aku empu besai meda orang betenun ke alai niang ini aku, Santa Jimbau, siku orang balat ngemeranka pengawa betenun pua kumbu ba rumah panjai.

“Berindik ari nya, aku ngembuan pengerindu enggau pengangkun ba pengawa betenun laban iya suah ngajar aku mayuh pengawa pengelandik jari baka nenun pua kumbu.

“Ari nya tadi, aku ngetan enggau mai ukir pua kumbu nyadi chuan genap pekayan ditengkebang ba M.O Sarawak,” ku iya ngelansa.

TENUN ASAL

Ku Mitza, pua kumbu tu mar ditenun lalu mayuh pekara dikemeratka ngambika ukir ba pua kumbu nya manding dipeda sereta ngembuan reti kediri empu.

“Pua kumbu tu suah nitihka ukir ari utai tumbuh enggau utai idup kelimpah begunaka pengelandik ti tinggi ari pengawa ngait ubung dataika nenun pua kumbu nya empu.

Siku peminat ari Poland mega rindu ngena gaya enggau ukir pisin pua kumbu.

“Ubung kena betenun tu digaga ari kain kapas ti ditanchang enggau direndam nitihka chura ke dikedeka ba kain nya.

“Pengepuh bala orang ke betenun tu patut dipuji laban pengawa tu endang lawit dikereja kelimpah pengiruh ngambi bulih ukir ti ngemantupka ati,” terang iya.

Ku Mizta, ukir bansa jelu ba pua kumbu nya bisi reti kediri empu ke alai bansa jelu ti diukir tu dikena ngelindung orang ti betenun nya.

Dulu kelia, pua kumbu suah dikena lebuh bisi gawai besai baka nyambut antu pala enggau anak baru ada.

“Nya kebuah, kami duai deka ngangkatka pua kumbu tu ngena ukir utai tumbuh ngambi ulih diterima sereta ulih dikena semua orang kelimpah ngemegahka agi ukir raban bansa Iban.

MANDANGKA PISIN… Mizta enggau Ostine begambar kenang enggau Datuk Seri Stephen Rundi Utom enggau Datin Seri Loretta Sawot ba Pengawa Mandangka Pisin Pua Kumbu M.O Sarawak 2019/2020.

TENGKEBANG NITIH PEMANSANG

Pua kumbu tu mega udah ditengkebang nitihka ubah pemansang lebuh semua komuniti nyengkaum sida ke lelaki bela bisi pekayan digaga ari ukir pua kumbu.

Mayuh pemar ditapi Mizta enggau Augtine lebuh nengkebang enggau ngelakuka pekayan pua kumbu ngambi rembus ngagai makit menua.

Pemar tu berindik ari runding komuniti luar pasal pua kumbu laban ukir enggau pua kumbu suah agi dikena ba adat enggau gaya idup komuniti Iban ba Sarawak.

“Aku agi ingat kami duai ngasaika pemar deka mantaika Pua kumbu nyadi pekayan ba sebengkah Anugerah Tebilang Menua iya nya Anugerah Bintang Popular Berita Harian (ABPBH) 2012.

“Pengudah nerang pasal guna enggau ukir pua kumbu, kami duai mujur mai pekayan Pua Kumbu keterubah iya dibantai ba Karpet Mirah sereta bulih Anugerah Penuduk Lima Pemadu Nyulut ba anugerah tebilang nya.

“Pemujur tu ngujungka tengkebang pua kumbu majak diterima ba menua Malaysia kelimpah nerima mayuh peminta pisin pua kumbu.

RUNDING SEMAMPAI POSITIF

Nambahka nya, Mizta enggau Ostine mega napi pemar ari sukut media rama laban semua tengkebang dibantai sebelah media rama sekalika ba Instagram tauka Facebook ngujungka bisi sekeda asil tengkebang seduai ditunda orang bukai.

Taja pia, kami duai berundingka pekara ari sukut positif ke alai sida ke nundaka gaya tengkebang tu sebagi ari pengawa pisin pua kumbu majak ditunda enggau diterima mensia mayuh ukai semina ba menua tu tang mega ngagai menua luar.

“Lebuh ngepunka dagang tu, M.O empu mayuh ngeluarka belanja enggau puku kediri empu kelimpah nyadi Wedding Designer.

“Ari nya, kami duai bulih puku ngerembaika agi dagang M.O Sarawak dataika sehari tu.

“Aku mega enda kala nerima latih ari sebarang ejensi bekaul enggau dunya pisin tu tang peneleba gawa ba sebengkah butik tebilang di Kuala Lumpur meri mayuh penemu enggau pengelandik ngasilka mayuh pisin baju ba M.O Sarawak.

“Asil ajar enggau pengangkun ngiga penemu ari orang ti ngembuan peneleba mai pemujur ngagai M.O Sarawak dataika udah manggai 10 taun ba taun 2020 dalam industri pisin.

“Nangkan nya, M.O Sarawak mega suah ngatur Malam Gala M.O Sarawak ti diatur ninting taun lalu Pengerami tu sebagi ari chara kami duai ngempung artis, pengemeran pisin enggau seni sereta komuniti,” terang iya.

MALAM GALA

Tuju Malam Gala tu diatur ngambi ngatur mayuh macham program baka pengawa mandangka pisin pua kumbu, pemerindang, mantaika tanda asal.

“Pengerami tu mega dikena ngangkatka dunya pemerindang enggau pisin ba Sarawak kelimpah ngangkatka produk dagang temuai ba menua tu ngambi dikelala ba serata dunya.

“Taun tu, M.O Sarawak merambu deka ngatur Pengawa Mandangka Pisin Pua Kumbu ngagai menua luar tang semua nya agi diperambu lalu mayuh pekara dikemeratka organisasyen kami empu,” tandu Mizta.

Peneleba ba dunya pisin tu ngujungka seduai kala dikangau nyadi akim ba sebengkah pekit ke bisi diatur ba menua tu baka nyadi akim Pekit Kumang Gawai Dayak Wilmar 2012, akim Pekit Kumang Pebedas 2016, akim Pekit Kumang Pebedas 2017, akim Pekit Kumang Raban Pengelandik Jari 2018, akim Pekit Kumang Indai Urang Raban Pengelandik Jari 2017, akim Pekit Ratu Pesta Kanowit 2017 enggau akim Pekit Belagu Pengerami Kanowit 2016.

Nangkan nya, seduai mega kala nyadi akim Pekit Ratu Kebaya Indai Urang 2018, akim Pekit Belagu Renggat Nengeri Sarawak (renggat sekula primari) 2017, akim Pekit Kumang Anak Mit SDNU 2017, akim Pekit Ratu Kebaya 2019 enggau akim Pekit Miss Batang Ai Festival 2019.

Kelimpah ari nya, seduai mega kala nempa mayuh pemujur ba industri pisin enggau pemerindang baka bulih Top 20 Piala Seri Endon 2009 Kuala Lumpur, Mandangka Pisin ba RTM Sibu beserimbai enggau Hari Orang Indu Renggat Nengeri Sarawak enggau Top 5 best dress Red Carpet Anugerah Bintang Popular Berita Harian 2012.

Ba dunya pisin, M.O Couture udah ngaul diri ba pengerami besai ti diatur ba Semenanjung baka nengkebang pekayan pua kumbu ungkup Soo Winchi iya nya siku pelakun, penanyi enggau Miss World Malaysia 2008 ba karpet merah Anugerah Industri Muzik 2013.

PENYELAI DIPUJI

Mizta enggau Ostine mega nyingkang ke mua lebuh ngaul ba Anugerah Juara Lagu Tv3, Anugerah Blockbuster Astro, Anugerah Skrin TV3, Anugerah Festival Filem Malaysia, Aiffa (Asean Festival Film Awards) , Anugerah Juara Rentak Ruai (AJARR) enggau Anugerah Carta Sapa Juara (ACSJ) RTM.

Ukai semina nya aja, seduai mega kala ngatur Pengerami Gawai Dayak 2019 Renggat Nengeri Sarawak ungkup Kumang enggau Keling.

Pengelandik nengkebang pekayan ngujungka seduai suah ditapatka artis ba Semenanjung enggau Indonesia ke alai seduai kala bekerejasama enggau nengkebang pekayan ngagai Kris Dayanti , Lisdawati , Shiha Zikir, Julia Ziegler , Sasha Saidin, Maria tunku Sabri , Shikin Gomez , Tuti (Asntm) , Dr. Soo Win Cii sereta ke bukai.

Diatu, pisin pua kumbu udah nyadi entara pisin pemadu tebilang ba menua kitai lalu suah mega kala dikangau enggau dirandau ba mayuh program televisyen baka HELLO ON TWO dalam taun 2012, randau ekslusif pasal Pisin Pua Kumbu ba Nona TV3 dalam taun 2013, dirandau ba Selamat Pagi Malaysia TV 1 beserimbai enggau Hari Sarawak 2017.

Terang iya, seduai kala dikangau ba randau ekslusif Anak Sarawak di Wanita Hari Ini TV3 dalam taun 2016, Unifi TV channel Salam HD 2019, RTM TV2 ba program Fresh Brew 2019, Hijabstalista 2019, RTM Sibu 2019 sereta kala dipilih dirandau ba Program NONA TV3 ungkup program Anak Sarawak Yang Berjaya dalam taun 2018.

Lebuh dirandau, Mizta madahka M.O Couture deka ngatur Malam Gala Sedekad kena bulan September ba sebengkah hotel tebilang di Sibu.

MAJAK PEGARI

Berindik ari nya, Mizta enggau Otine ngarapka M.0 Sarawak ti udah manggai 10 taun ba dunya pisin di Sarawak enggau Malaysia majak pegari enggau dikelala ba mata dunya.

Seduai ngarapka pisin pua kumbu deka dikelala ba serata dunya ngambi mantaika pengeraja seni ba menua Sarawak kelebih agi ukir raban bansa Iban.

“Nya alai, aku ngarapka dunya pisin pua kumbu majak diterima lalu pekayan mega deka nitihka trend kemaya hari tang mengkang ngena ukir pua kumbu.

“Nembiak rebak baru patut ngenanka ukir bansa kitai ngambi dikelala ba serata dunya laban bansa Iban endang ngembuan pengeraja ari sukut adat enggau gaya idup,” ku Mizta nyimpul randau.