SRI AMAN: Siku deriba lori tekenyit tetemuka agum (engkeramba) dedegi ba tisi stor MDSA di Taman Sabu ditu.

Nusuika pekara nya, Gannydi Banie asal ari Rumah Belulok,Melugu Kuari B ditu madah, pagi kemari iya bisi diasuh kompeni nganjung Pak Penanda Jalai ngagai stor MDSA .

“Enda nemu nama kebuah, enda memukai kepuas ke merening babas ba tisi stor dia aku lalu tepedaka agum nya,”ku iya.

Nambah nya ku iya, agum ti digaga ari semin nya enti diperati enggau manah mandangka pendiau siku lelaki Iban benung ngajat laban bisi gaya iya megai duku taja udah patah.

Dulu ari nya, ba media rama Gannydi bisi mantaika sekeda gambar agum nya enggau lalu mansutka penyiru diri ngagai agum ke ditemu iya nya.

TEMU AKU DITU…Gannydi nunjuk palan alai iya tepedaka agum nya.

Dalam posting facebook iya, Gannydi madah ‘sayau cukup sayau di tempayak pia aja…nti bka MDBSA ka meri ku tu ka ku mai pulai…taja tu batu tang patung tu besai reti ba bansa dayak..enti ulih anang mh nempayak ke ya pia aja beri ke kami ke ka ngbun ya,” ku munyi sebana iya ti mayuh nerima timbal positif ari mensia mayuh.

Mua ke lemai kemari, agum nya diperita udah dikemendarka MDSA dibai pulai.

Ngenukuka pekara tu, Ketuai Gerempung Dayak Bukit Kelingkang (DBK) Insol Harry lebuh dirandau Suara Sarawak madah, agum nya amat udah diambi lalu deka nyadi reta gerempung nya pengudah nerima pemendar piak MDSA.

“Agum tu udah dibai kami pulai, lalu deka diintu kami sebuat enggau manah. Ukai bisi tuju nama-nama tang ngichaka jemah ila sida ke rebak baru meretika identiti diri lebuh meda agum tu,” ku iya.

Nangkan nya mega ku iya, meri besai terima kasih ngagai piak MDSA laban udah ngemendarka DBK ngempu agum nya.

“Pemendar ari MDSA tu chukup besai reti ba kami (DBK) laban endang sigi angkun sereta siruka keresa lama kitai bansa Iban,”

“Pia mega ngambika agum tu enda diempaya ngapa baka ke dipeda kitai sebedau tu,

“Kebuah aku munyi nya, laban aku endang sigi rindu meda keresa lama kitai Iban tambah mega aku pechaya agum tu endang sigi agum kitai bansa Iban ari perati aku,”ku iya nyemetak.

Nangkan nya, Suara Sarawak bisi minta timbal ari piak MDSA bekaul enggau agum nya tang sida bedau ulih meri timbal ketegal ti benung kiruh gawa.

SEBANA…Sebana Gannydi maya tetemuka agum nya.