SARIKEI: Urung 3,000 kaban Parti Keadilan Rayat (PKR) Pampang Tanjung Manis pansut ari parti nya ba sebengkah penerang ke dipansut kemari.

Pekara nya dibantaika ex-Sekretari Pampang Keadilan Tanjung Manis, Hasrol Ali ngarika 3,000 iku kaban ti madah diri pansut ari PKR.

“Tu digaga laban kami nadai agi arap ngagai Presiden PKR, Datuk Seri Anwar Ibrahim enggau ketuai renggat tinggi parti,” ku iya nengah nengah sebengkah penerang media ditu, kemari.

Tandu Hasrol, Anwar mega enda ulih diangkat nyadi Menteri Besai Kelapan.

“Tambah mega, ketuai pampang ke dipilih sekeretari besai nyau baka ke nadai guna nyentuk kami ngasaika diri kelalu jauh ari kuing tuju parti.

“Kami agi nyukung penuh iring Sapit Presiden PRK, Datuk Seri Mohamed Azmin Ali, Mandal Presiden Zuraida kamaruddin sereta Chairman Kaunsil Ketuai Sarawak, Baru Bian,” ku iya.

Ku iya, sida enggau rayat Sarawak minta Tun Dr. Mahathir Mohamad terus ngiring menua nyadi Menteri Besai nyentuk Pengawa Bepilih Besai Ke-15 (PRU15).

“Sebedau tu, 12 kaban komiti nyengkaum ketuai pampang udah dikinsil nyadi chalun maya Pengawa Bepilih Pampang Keadilan Tanjung Manis kena 3 November taun nyin kemari.

“Kena 12 Januari tu tadi, urung 35 iku kaban komiti ari Pampang AMK enggau Indu ningkilka diri ari tanggungpengawa laban enda lantang ati enggau pemutus Sekretari Besai Keadilan, Datuk Seri Saifuddin Nasution,”ku iya.

Kenu ku iya, piak sida berasai ensiban lanan nyentuk sehari tu piak Keadilan Renggat Tinggi nyau baka enda ngibuhka pekara tu.