Sistem Solar Ai Angat

SARIKEI: Sepital Sarikei nyadi sepital keterubah Sarawak ngena Sistem Solar Ai Angat nengah pengawa ngelimatka Kunterik Penyulut Kuasa Karan (EPC).

Projek nya inisiatif ari One Medicare Sdn. Bhd (OMSB) ti nyadi serikat konsesi Servis Meri Nyaup Sepital ti dipilih Perintah Sarawak.

Tuju projek tu dikena ngemanah Dandang Konvensional ngagai Sistem Ai Angat Solar enggau nukar lampu bansa tiub fluorescent ngagai tiub LED ba sepital nya.

Ketuai Pemesai Eksekutif OMSB, Sazali Tuah Neli madahka inisiatif nya dikena nyapai tagit ngelimat 95 peratus bil diesel ungkup sistem dandang konvensional ke bisi enggau ngelimat 69 peratus kuasa karan lebuh ngena lampu.

Ku iya, projek tu berengkah dipejalai bulan Februari 2019 lalu tembu kena 31 Julai taun ke sama.

“Sistem Ai Angat Solar tu udah berengkah dikena 1 Ogos 2019 lalu nengah projek tu, Sepital Sarikei ngena teknologi baru ngambi enda suah ngena sistem dandang konvensional lebuh bekenaka ai angat kelimpah lampu fluorescent kurang agi dikena ba sepital nya,” ku iya meri penerang, ditu tadi.