“Perintah diatu enti nunda terus meri Seksyen 18 ngagai sida ke beempu tanah NCR ngambika pala tanah ulih dikeluarka tekala nya.”

ENGKILILI: Kanun Tanah Sarawak 1958 nyangka tau dipansik baru ngambika tau mutarka penanggul ti nuntung orang ke beempu Tanah Adat Bumiputera (NCR).

Kaban Kunsil Nengeri (Adun) Engkilili Dr Johnical Rayong Nyipa madah, kebuah pia laban Parti Sarawak Bersatu (PSB) meda isu (tanah NCR) ke nyadi diatu baka ke nadai pengujung iya.

“Kami PSB deka nyadi jematan rayat lebih agi bansa Dayak ngaduka penanggul tu.

“Kami meda hak rayat patut dikemerat laban kitai enda ulih bechiping ngatur tanah rayat,” pia ku iya madah maya bejaku ba pengerami jematan gantung Rumah Jangin Sare, Kejemut di Lidong ti beungkus RM350,000, empai lama.

Iya ti mega Mandal Presiden PSB madah, perintah diatu enti nunda terus meri Seksyen 18 ngagai sida ke beempu tanah NCR ngambika pala tanah ulih dikeluarka tekala nya.

“Ba kami, bisi pekara ke tentu betul ba pengawa mutarka isu tanah di nengeri tu,

“Nya alai, polisi ke diatu patut bendar diperatika baru tauka dikinsil lalu tu endang siti tuju PSB enti rayat meri PSB megai nengeri tu,” ku Ketuai Raban Nembiak PSB nya mega.

Ba pekara bukai, Rayong madahka iya berasai sinu berati sida ke ngambi bagi ba SALCRA laban nyentuk diau tikas pengidup sida nadai insur taja udah enggau prohjek nya bepuluh taun ari suba.

“Komisen ke diterima pan enda tentu mayuh, ngarapka tanah pesaka ti dikemansang tang semina mai penguntung ngagai orang bukai.

“Enti nunda tanah nya patut ditikal pulai ngagai sida ke ngempu enti enda tepulaika penguntung ngagai sida ke ngempu,” ku iya madah.

Iya madah, rayat menua pesisir patut nerima pemansang baka karan, jalai alun enggau ai paip.

Ku iya, baka ba DUN Engkilili, berengkah 2006 nyentuk ke diatu nyauka semua genturung menua baika nya Melayu enggau China udah ngasaika pemansang nya.

Ba pengerami ti digulu 31 iku tuai rumah ari Kejemut, Lipat, Lidong, Skrang Ili enggau Tabut nya, Rayong bela bisi nyuaka 18 iti chek sepenyampau RM100,000 ngagai gerija, JKKK enggau Biro Raban Indu.