PADB mantah perambu Sungai Asap dipasuk dalam Pelilih Sebauh

BINTULU: Gerempung Anak-Anak Pelilih Belaga (PADB) nulak perambu ti madahka Sungai Asap deka dipasuk dalam Pelilih Sebauh.

Ku Ketuai Gerempung nya, Edward Agong Ajang, peranak menua nya cukup teguran ati enggau perambu nya lalu nganggap ulih ngubah landskap sosiopolitik endur nya.

“Kami cukup enda nyamai ati enggau perambu tu lalu kami minta Perintah Menua berunding dulu beduduk ari perambu nya,”

“Utai ke dikedeka kami iya nya perintah ngangkat tauka ngaga Pelilih Belaga tu nya siti Bagi Menua lalu ukai ba baruh pelilih bukai,” ku iya.

Edward mansut jaku penerang nya ngelawa pengarang berita, ditu sehari tu.

Sebedau tu, ku iya, peranak pelilih nya udah ngasai ke pemerinsa ketegal sida ke pindah ngagai Sungai Asap-Koyan enggau Metalun-Tegulang beduduk ari Projek Tekat Ai Bakun enggau Murum.

“Kami enda pecaya berita ke didinga pansa pending ke deka ngasuh endur kami dipasuk ba baduh Pelilih Sebauh lalu nyema berita ke ngerekai tu amat kami enggau bebendar nulak perambu tu awakka enda nyadi nyata,” ku iya.

Berebak enggau nya sida besai bendar pengarap ati Sungai Asap tu terus ba baruh Pelilih Belaga.

Nambah ke nya, iya madah Belaga siti ari pelilih ke mansutka kuasa karan ke pemadu besai di menua tu.

“Belaga patut diangkat awakka sama mansang lalu pengelantang pendiau rayat di pelilih tu patut dikemeranka dulu lalu tu beduduk ari kuasa karan ke pansut ari endur tu mega,” ku iya.

Naka tu, Edward madah bisi 12 suku bansa ke mangkang menua nya lalu ketebal agi iya nya bansa Orang Ulu.

“Kami mutus madahka gerempung tu nulak perambu ti deka masuk ka Sungai Asap ngagai Pelilih Sebauh,” ku iya.

Sama bisi datang ba penerang nya iya nya, Sapit Chairman PADB, Awang Mataali, Sekretari PADB Sangai Kasing, engau Kaban Supreme Kaunsil PADB, Stephen Kulleh.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak