KOTA SAMARAHAN: Sepenyampau 54 iku ari 18 ruang bilik di Kampung Simunjan Jaya agi diau bemalam ba palan ngenduh ditu ketegal penusah ampuh bah.

Pengari Sekretariat Komiti Penyangga Penusah Ngenyit Sarawak Mejar (PA) Ismail Mahedin madah, semua sida udah dipindah ngagai palan nya kenyau ari Hari Dua tu tadi.

“Semua sida ke tasah ampuh bah agi ngenduh ba Dewan Mesra Simunjan,” ku iya meri penerang, ditu tadi.

Ku Ismail, sida enda ulih pulai ke rumah diri empu laban ai empai surut.

Nambahka nya ba Kapit ku Ismail, peranak Kampung Long Busang, Belaga mega dituntung penusah ke sama berindik ari ujan bangat kenyau ari malam Hari Dua tu tadi.

“Ujan bangat ba ulu Sungai Balui ngujungka tikas ai ba Kampung Long Busang majak niki,” ku iya.

Nangkan nya, iya mega madah naka kemari semina padang sekula udah ampuh ai lalu nadai rumah kena ampuh ai.