KUCHING: Perintah Sarawak bejalaika sekeda Polisi Imigresyen nentuka menua tu likun ari pengerekai igi penyakit Covid-19.

Nitihka penerang ari Seketariat Penyangga Penusah Ngenyit Nengeri (JBPN), semua peranak luar (nadai ngira peranak menua ni) ti kala nemuai ke menua China nyengkaum Hong Kong, Macau, Taiwan, Korea Selatan, Itali enggau Iran dalam kandang 14 ditagang tama ke menua tu.

“Semua rayat Malaysia (ukai peranak Sarawak) ti udah ngagai China nyengkaum menua Hong Kong, Macau, Taiwan, Korea Selatan, Itali enggau Iran dalam kandang 14 hari kepenudi dipinta enda nemuai ke Sarawak.

“Semua rayat Sarawak enggau peranak Sarawak nyengkaum pemegai pas pengereja enggau nembiak ti nemuai ke China nyengkaum Hong Kong, Macau, Taiwan, Korea Selatan, Itali enggau Iran dalam kandang 14 hari dipinta ngurung diri pengelama 14 hari,” ku iya meri penerang.

Ku iya, sida mega deka nitihka pengawa matau bekala ari piak bekuasa bekaul.

Terang iya, semua temuai ari menua ti kena rampit penyakit tu baka Singapore, Indonesia enggau Jipun dikelalau nitihka atur ti dikeluarka Opis Pengerai Sarawak ba semua pintu penama.

Atur nya sebagi ari chara Perintah Sarawak ngurangka pengerekai igi penyakit Covid-19 ke Sarawak.