KUCHING: Ulah enda mudah putus pengarap nyadi kunchi pemujur nembiak ti ngembuan penanggul meda bulih 9A ba peresa Sijil Pelajaran Malaysia (SPM) 2019.

Anak siku pekebun, Jane Teng Siew Wei ari SMK Meradong, Sarikei nya madahka kunchi pemujur ti diulih iya diatu berindik ari prinsip enda mudah putus pengarap nya.

Taja pia ku iya, iya kala putus pengarap belajar laban penanggul meda ti ditapi iya nya.

Tang berindik ari sukung ari pengajar enggau bala bakih iya, iya seruran netapka pengawa belajar sereta nyapai penyulut baka nembiak bukai.

“Aku napi penanggul tu kenyau ari Pom Empat lalu pekara tu kala ngasuh aku putus pengarap ba pelajar aku, suah nyabak, sinu lalu ngasaika diri nadai guna laban pengurang diri.

“Bala pengajar suah meri aku jaku lalau, iring enggau sukung ti kering ngagai aku. Pia mega bakih aku suah ngajar aku enti aku enda meretika pelajar ba siti-siti subjek nya,” ku iya lebuh dirandau pemberita pengudah pengawa mantaika pemutus SPM 2019 di Auditorium Opis Pelajar Nengeri Sarawak (JPNS), pagi tadi.

Nangkan nya ku iya, nyau ka setaun alai iya ulih nerima pengurang ba diri empu taja pedis endur iya deka nerima pengurang nya.

“Pengudah nerima pengurang tu, aku bebendar agi belajar lebuh aku ba Pom Lima,” ku iya.
Kelimpah ari nya, Jane madahka iya bekenaka kanta lebuh belajar seraya lubah mimit ari bakih ke bukai berindik ari penanggul ditapi iya nya.