KUCHING: Indai nyadika peransang Stephanie Bacha Menari, 18 taun belajar bebendar ba peresa Sijil Pelajaran Malaysia (SPM) 2019.

Stephanie belajar ba Sekula Sekondari (SMK) Muara Tuang, Samarahan bulih pemutus peresa ti nyulut iya nya 9A+ ba semua subjek diambi iya ba peresa nya.

Iya mega nyadi siku aja pengari anak Dayak rambau pengawa nerima pemutus peresa SPM 2019 ti nyulut di Auditorium Opis Pelajar Nengeri Sarawak (JPNS), kemari.

“Keterubah iya, aku endang tekenyit lebuh nemu diri nerima pemutus tu laban enda ngadang diri bulih 9A+ ba peresa SPM tu.

“Enti semina angan aja pan semina 9A, enda nyangka A+ semua subjek,” ku iya lebuh dirandau Suara Sarawak.

 

NYULUT… Stephanie mantaika pemutus peresa SPM 2019 iya ti bulih 9A+.
Lebuh dirandau, iya mega madahka diri nadai tips belajar ti ulih ngasuh iya bulih pemutus ti nyulut baka ke diatu.

“Lebuh ba sekula, aku semina nitihka jaku pengajar. Nya ke pemadu beguna,” ku peranak Iban nya.

Stephanie mega madah ba pemutus peresa tumu sebedau tu iya semina bulih 7A+,1A, 1A-.

Iya mega madah kuing iya udah tu enggai nampung pelajar iya kelalu jauh.

“Aku engka deka minta ba Asasi di Unimas tang enti sema bisi bulih sekularship, nya siti rejeki ngagai aku belajar ngagai menua bukai,” ku iya.

Lebuh dirandau bekaul enggau sida sebilik, Stephanie madahka apai iya gawa di Opis Marine ditu lalu indai nadai kereja.

JULUK ATI… Randee ti deka nampung pelajar ba bidang injinir mantaika pemutus 8A+2A dalam peresa SPM 2019.

“Indai aku suba gawa, tang udah iya ngadaka aku iya lalu badu gawa laban deka ngibun aku enggau menyadi aku ke biak.

“Lebuh aku berundingka indai aku ti badu gawa ketegal deka ngibun aku enggau menyadi aku nya, nya mih ke ngasuh aku deka bebendar agi belajar,” ku iya seraya madahka diri kala deka putus pengarap ba pelajar iya.

Pia mega, siku agi nembiak penakan Bidayuh China, Randee Nolan Law ti bulih pemutus 8A+2A madahka iya chukup gaga enggau pemutus peresa iya taja enda baka ke ditagit iya sebedau tu.

“Aku chukup gaga enggau diri empu laban udah ngaga enggau manah ba peresa aku sekali tu.

“Ngagai bala bakih ke deka ngambi peresa tu taun tu, belajar enggau manah ngulihka pemutus A+ penuh dalam SPM,” ku iya.

Ku Randee, iya endang nagit diri bulih A+ penuh dalam peresa nya tang pemutus tu udah chukup ngasuh iya gaga sereta puas ati.

Lebuh dirandau, iya madahka diri deka nampung pelajar ba bidang injinir laban iya chukup rinduka pengawa ba bidang elektronik fizikal.

“Aku mega engka deka minta nampung pelajar ngena UPU, ba matrikulasi tauka minta biasiswa JPA enti sema bisi,” ku iya.

Lebuh belajar, Randee madahka diri ngatur jam belajar enggau manah sereta anang tusut runding.

“Kitai patut nemu magi maya belajar enggau bemain laban idup tu ukai semina patut belajar aja tang meseti bisi bemain sekejap,” ku iya ti mega anak ngagai pengajar Jaku English ba sekula iya empu.

Randee nyadika pengeransing apai enggau indai iya gawa ngemesai sereta nganjung iya besekula siti kebuah iya bebendar belajar ngambika bulih pemutus peresa ti manah.