KUCHING: Parti Liberal Demokratik (LDP) enggau Parti Se’ati Rayat Sarawak (SUPP) deka berundingka kerejasama maya Pengawa Bepilih Besai (PRU) ke deka datai.

Presiden LDP Datuk Chin Su Phin madah, sida nya parti dalam nengeri ti bepengkalan di Sabah.

Lebuh ditanya pemberita sekalika deka ngaul kerejasama enggau SUPP, iya madahka diri begunaka parti menua di Sabah enggau parti menua di Sarawak ngambi bekerejasama enggau begempung.

“Aku ngasaika kerejasama tu ungkup PRU ke deka datai ngambika kitai ulih numbuhka siti tim,” ku iya lebuh dirandau pemberita ba pejalai nemuai basa di Indu Opis SUPP, ditu lemai tadi.

Nangkan nya, Presiden SUPP Datuk Seri Dr Sim Kui Hian madahka piak LDP semina datai nemuai enggau bekunsika penemu sida aja.

“Kami tu parti politik ti bekaban manah enggau LDP ngusung sereta kami bela bekunsika penemu aja.

“Parti politik semampai begusung enggau pangan diri lalu beberapa bulan ke udah, Parti Gerakan Rakyat Malaysia mega bisi nemuai kitu,” terang Kui Hian.

Lebuh ditanya pasal kerejasama ungkup PRU ke deka datai, iya madahka sida nadai bekerejasama enggau Sarawak deka negika menua tu empu.

“Taja pia, kami enda ulih madahka kami enda ngelala sida (LDP) laban Sabah enggau Sarawak tu semak aja,” ku iya.