KUCHING: Kabinet Perintah Besai ke deka ditumbuh enda lama agi deka nguna formula Perikatan Nasional + Gabungan Parti Sarawak (PN+GPS).

Kepala Menteri Datuk Patinggi Abang Johari Tun Openg madah kebuah pia laban GPS entiti politik kediri dikena numbuhka kabinet Perintah Besai nya.

“Pemutus ngena formula PN+GPS tu udah dikerandau enggau Menteri Tan Seri Muhyiddin Yassin lalu iya udah setuju.

“Kitai ngaga pemutus nya laban berundingka pemaik menua enggau kelebih agi rayat Sarawak,” ku iya.

Iya madah munyi nya pengudah betuaika Aum Supreme Kaunsil Parti Parti Pesaka Bumiputera Bersatu (PBB) ba Indu Opis PBB di Jalai Bako ditu, lemai tadi.

Abang Johari berebak enggau nya madah rintai kabinet nyangka deka dibantai Menteri Besai dalam timpuh dua tauka empat hari deka datai.

Ku iya, Muhyiddin siku ketuai ti mayuh peneleba lalu kala mangku beberapa penuduk dalam kabinet Perintah Besai sebedau tu.

“Iya kala mangku penuduk nyadi Sapit Menteri Besai lalu iya nemu utai ke diguna Sarawak.

“Iya mega kala ngelawa sitak menua pesisir Sarawak baka Lawas, Limbang enggau mayuh agi ke bukai kelimpah kala mangku mayuh portfolio maya nyadi siku ari menteri sebedau tu,” ku iya.