KUCHING: Kenyalang Gold Card tauka Kad Emas Kenyalang (KGC) udah berengkah dichelak lalu disadung ngagai bala sida ke bisi minta enda lama agi bepelasarka peminta ke udah diterima.

Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah madh, KGC nya deka dterus disadung nengah kerejasama ari perintah enggau gerempung ukai perintah nyengkaum piak SUPP, MBKS, Kaunsil Ruang Bilik enggau Orang Indu Sarawak (MWKS) sereta sida bukai.

“Kitai bisi nerima 17,024 tang ari penyampau nya semina 4,045 ke bisi penanggul penerang enda penuh baka lenyau penerang nyengkaum lumur tingki, lumur telefon enggau ke bukai.

“Taja pia, peminta nya mega ulih ngaduka baru penerang ke bedau penuh sehari tu (7 Mac) ba ruai dipenggi Socoe enggau kad kita deka terus dichelak. Tu chukup jampat,” ku iya.

Iya madah munyi nya rambau bejadika Sarawak Women X: Global Innovation Entrepreneurship nyerumba Pengerami Orang Indu ba Palan Aum Borneo Kuching, ditu pagi tadi.

Tandu iya, dikena ngemujurka KGC nya Perintah Sarawak udah ngemendarka agih belanja penyampau RM 24,493,635 juta.

“Lalu naka 4 Macrh tu tadi, piak kami mega udah nerima 133,342 peminta iya nya sama enggau 40 peratus, tu ari 334,500 iku orang tuai bepelasarka penyampau peranak menua tu taun tu (2020),” ku iya.

Kenu ku Fatimah mega, KGC nya meri mayuh pemaik ngagai sida ke bisi kad nyengkaum Bantu Rabat penyampau RM3,000 dikena mantu nyengai sida ke udah nadai.

“Pemaik bisi KGC mega mungkur bantu potong rega, rebat tauka bayar pechuma ungkup barang sereta servis ke bisi disediaka opis perintah, piak swasta enggau palan kedai besai ke nyadi bakih strategik KGC.

“Tu nyengkaum ba bidang pengerai (perubat enggau penyaga), perengka pengangkut, barang guna baka baju kasut, optikal enggau barang guna ninting hari,” ku iya.

Pagi tadi, Kepala Menteri Datuk Patinggi Abang Johari Tun Openg udah bejadika KCG nya.