BERINDIK ari pengingin ati deka ngenang jasa raban indu ti udah nyadi indai kelebih agi indai dikesayau iya.

“Leka lagu Indai tu dituju khas ngagai indai aku kelai ngenang jasa enggau meri terima kasih ke pemanah budi iya udah berambun nyawa ngadaka aku lalu ngembing aku siku orang ti menyana.

“Pia mega, kasih sayau indai tu chukup berega laban pemujur diasaika kitai diatu bepun ari pengerindu apai enggau indai.

NK Yongai ti tebilang enggau lagu Indai beumur 37 taun, siku graduet Universiti Teknologi MARA, Kampus Samarahan ba Fakulti – Diploma Pengurusan Perniagaan (2001-2004) lalu diatu iya gawa di baruh sebuah organisasyen perintah ba Opis Pekara Ekonomi.

Ukai semina siku orang ti ngembuan pelajar tinggi tang mega NK Yongai tu ngembuan patah nyawa ke chukup manah.

Lebuh dirandau sentang sapa ke nyadi peransang nyentukka diatu, dia iya madahka apai indai, diri sebilik enggau bakih nya mih ke seruran meri jaku peransang enggau semengat.

TERIMA KASIH INDAI… NK Yongai begambar kenang enggau indai iya.

“Sida tu mih ke suah enggau aku lalu meri jaku peransang sereta ajar lebuh aku labuh enggau angkat nyadi siku pengemeran seni.

“Sukung bala sida tu meri besai reti ba pengidup nyadi siku pemerindang ngambika aku bisi semengat enggau angkat baru lebuh nempuh mayuh penguji.

Pemujur NK Yongai tu bepun ari mayuh kenang manis baka menang pekit enggau bulih anugerah dataika iya enda putus pengarap nengkebang lagu enggau merindang bala peminat ba selampur Sarawak tu.

LAGU MANGKA PENGIDUP MENSIA

Pengeransing iya nengkebang lagu ke chukup manah ngujungka iya majak dikerindu bala peminat kelimpah leka lagu ke ngembuan besai reti ba pengidup siku-siku mensia enggau peminat.

ALBUM KETERUBAH… Pengawa Ngelancharka Album Geregaya Ati NKYONGAI di The Summer Mala kena 25 Mei 2019.

Lagu Indai mega ngangkatka nama NK Yongai ba industri muzik Iban laban leka jaku Indai nya meri besai reti kediri empu ngagai bala peminat ditu.

Kitai bela nemu, indai nya mih orang pemadu bejasa ba pengidup semua kitai lalu empu kurang mega enggau bala apai. Apai enggau indai kitai mih nempa kitai nyadi orang ke menyana diatu.

“Nya kebuah, anang enda ngenang jasa enggau pemanah apai enggau indai kitai. Pemujur kitai diatu bepun ari chara sida nyeridi kitai kenyau ari mit.

Entara pekit enggau anugerah ti kala diempu iya baka lagu Malam Tu Empu Tua nyadi Lagu Nang Antap Anugerah Carta Cats Xposed Ethnic Division (CXA) VOL 1 kena bulan April 2019.

NK Yongai mega kala nyadi Finalis Anugerah Carta Sapa Juara (ACSJ6) mai lagu Indai kena bulan November 2019.

Pemujur tu meri semengat ngagai NK Yongai ngambi terus nengkebang lagu enggau merindang bala peminat ditu.

“Ba lagu Sempun Pengerindu enggau single keterubah aku, lagu tu ditengkebang aku pengudah pemidang orang pemadu dikesayau iya ini aku.

“Leka lagu tu ngembuan besai reti ba pengidup aku laban aku ngenang kenang manis kami duai ini lebuh iya agi idup suba. Pemidang iya ba dunya tu ngasuh aku balat sinu laban lenyau orang pemadu dikesayau,” tandu iya.

Nambahka nya, NK Yongai madahka diri chukup rinduka lagu 80-an, Pop Balada, R&B lalu iya rindu amat ninga lagu Brorey Marantika, Dayang Nurfaizah, Judika, John Legend, Josephine Jalin enggau Micheal Jemat lalu rintai artis tu nyadi peransangg ba pejalai seni iya di dunya pemerindang tu.

Ngelansa pasal pejalai iya dunya pemerindang, NK Yongai madahka diri udah ba dunya pemerindang tub a pun taun 2016 nyentuk diatu.

Ku Yongai, mayuh kenang manis enggau pait ke kala diasaika iya kenyau nyadi siku pengemeran seni ba menua tu.

“Kenang manis enggau pait nya mayuh ngajar aku sentang kuing pejalai seni ditu lalu peneleba ke kala diasaika aku suba ngasuh angkat baru.

“Semua pekara positif nya dikenang aku belama kelai ngenang pemujur diri lalu penemu negatif nya nyadi teladan enggau ngingatka diri empu sentang pemar ba dunya pemerindang lalu nemu penatai diri.

Album keterubah NK Yongai dikumbai Geregaya Ati udah dilanchar kena 25 Mei 2019 ba The Summer Mall, Kota Samarahan di baruh produksi Kaban Music Production.

Nangkan nya, album tu asil kerejasama enggau produser Randhi Enrique sereta komposer enggau penengkebang leka lagu ti tebilang iya nya Ayed Joe, Hairee Francis, Mamie Cheremie enggau NKYongai empu.

Ba album keterubah nya, bisi tujuh lagu hits iya nya Sempun Pengerindu, Malam Tu Empu Tua, Indai, Danji, Aku Nemu, Kair Empu enggau lagu Jelungai disadaka Nathalie Anik.

(Berita penuh dibantai ba surat kabar pagila)