SIBU: Perintah nengeri napi pemedis ketegal ulah perintah Pakatan Harapan (PH) ti nginsil sereta matak baru mayuh pojek di Sarawak lepas sida bekuasa.

Sapit Kepala Menteri Datuk Amar Awang Tengah Ali Hasan madah, tu ngujungka perintah nengeri nyau nampung semua projek ke udah dikemendar perintah dulu suba, Barisan Nasional (BN).

“Nadai mayuh utai ke digaga sida ngagai Sarawak sekumbang 22 bulan sida nyadi perintah ba renggat perintah besai.

“Nya mih balas lebuh PH tungkup diatu,” ku iya maya Pengerami Nyuaka Pampas Tanah Ungkup Projek : Proposed Second Trunk Road Package C2 (Ngaduka Jalai Tanjung Genting Ari Jalai Tulai-Lanang Bridge, Sibu) ditu, pagi tadi.

Awang Tengah madah, Sarawak patut beterima kasih ngagai perintah Gabungan Parti Sarawak (GPS) dibaruh iring Kepala Menteri Abang Johari Tun Openg laban ulih bejalaika projek nya ngena belanja diri empu.

“Kitai GPS bisi penatai pemisi kediri lalu nya kebuah kitai deka ngeletak chukai lima peratus ungkup produk petroleum enggau gas kitai.

“Asil ari chukai nya deka dikena ngemujurka projek ungkup pengelantang rayat,” ku iya.