SIBU: Sapit Kepala Menteri Tan Sri Datuk Amar James Masing meri ulu lungga ke alai Pengawa Bepilih Nengeri Ke-12 (PRN-12) diatur enda lama agi.

“PRN-12 engka diatur dalam taun tu,” ku iya.

Masing mansutka jaku tu lebuh ngulu Pengerami Ngintu Hari Orang Indu Sedunya diatur Exco Indu Parti Rakyat Sarawak (PRS) Wilayah Tengah ditu, malam tadi.

“Enda nya lama kitai deka napi PRN-12. Nyau majak semak, engka dalam taun tu.

“Nya alai aku dekaka raban indu PRS begulai begulai enggau bala kaban parti bukai nyikap diri napi pengawa bepilih tu kelebih agi parti ke datai ari Semenanjung Malaysia; PKR enggau DAP.

“Pangku pengawa orang indu beguna amat nyaup kitai ngetanka hak Sarawak sereta mai Gempung Parti Sarawak (GPS) ke nyadi Perintah Sarawak menang besai sekali tu,” ku Masing.

Iya minta bala kaban parti anang berasai nangi enti sema PRN-12 diatur enda lama agi.