KUCHING: Chairman Gempung Parti Sarawak (GPS) kena Hari Enam tu tadi ngenukuka deka bisi pengari parti nya dalam Kabinet Perintah Besai.

Datuk Patinggi Abang Johari Tun Openg ke mega Kepala Menteri madah, pemutus nya digaga Parti Pesaka Bumiputera Bersatu (PBB) begulai enggau komponen parti GPS – Parti Rayat Sarawak (PRS), Parti Sa’ati Rayat Sarawak (SUPP) enggau Parti Demokratik Progresif (PDP).

“Kitai udah ditunang Perintah Besai ngambika nyereta kabinet lalu PBB ngaga pemutus nyereta kabinet ke ditumbuh Menteri Besai (Tan Sri Muhyiddin Yasin).

“Taja pia, kitai nyereta kabinet ketegal dua kebuah,” ku iya pengudah nyadi ketuai Aum Supreme Kaunsil PBB ba Indu Opis PBB Jalai Bako ditu, kena 7 Feb tu tadi.

Abang Johari madah, kebuah keterubah GPS nyereta kabinet Perintah besai laban dikena neruska pengawa negika hak ke ditaih rayat Sarawak lebih agi bekaul enggau pemaik Sarawak.

“Nyema kitai enda nyereta kabinet Perintah Besai, kitai enda nemu utai ke deka nyadi,” ku iya.

Kenu ku iya, kebuah kedua GPS nyereta kabinet ngambika kaban parlimen Sarawak ulih neruska pengawa negika Sempekat Malaysia 1963 (MA63) lalu ngarapka Petronas ngasika undang-undang nengeri nyengkaum pasal chukai jual (SST).

“Taja pia, aku udah nyerahka sebarang pemutus ngagai Menteri Besai nentuka portfolio kabinet pengari Sarawak ba renggat Perintah Besai.

“Kebuah pia, Menteri Besai chukup mayuh peneleba lalu kala nemuai ngagai sekula-sekula ba kandang menua pesisir Sarawak maya agi nyadi Menteri Pelajar,” ku iya.

Ku iya, Menteri Besai bisi nganggauka GPS nyereta kabinet Perintah Besai kira dua hari ke udah.

Ngelansa pasal pekara bukai nyerumba aum nya, Abang Johari madah, GPS deka ngemeratka pengawa negika hak ungkup nengeri Sarawak.

“GPS endang sebuah entiti politik ke ada ba Sarawak lalu deka terus negika hak-hak nengeri baka ke udah dipekat dalam undang-undang Malaysia.

“Nyema bisi nyadi penyarut dalam menua, nyadi GPS patut berunding mutarka penyarut nya laban nya bekaul enggau pengelantang menua sereta pangka ngagai Sarawak,” ku iya.

Iya mega mada, penyarut politik ke nyadi apin lama ke udah ngujungka mata wang enda menuku kelimpah ari pekara bukai baka Covid-19.