“Ngena laman web khas tu, penanggul ba genturung pendiau komuniti ulih dianjung enggau jampat ngagai piak pengereja pengawa DBKU.”

KUCHING: Dewan Bandaraya Kuching Utara (DBKU) patut ngembuan siti laman web khas dikena ngerapatka kaul entara DBKU enggau komuniti.

Kepala Menteri Datuk Patinggi Abang Johari Tun Openg madahka pengawa ngena teknologi ba pekara nya ulih nyadi jalai dikena mutarka penanggul ti ditapi komuniti di baruh DBKU.

“Ngena laman web khas tu, penanggul ba genturung pendiau komuniti ulih dianjung enggau jampat ngagai piak pengereja pengawa DBKU.

“Tu reti iya komuniti ulih nganjung mesej sida terus ngagai DBKU ngambika penanggul nya ulih teputar enggau jampat,” ku iya.

Abang Johari madah munyi nya ba pengawa betemu khas Kepala Menteri begulai enggau Kejiranan Mesra (KJM) BDKU ba sebuah hotel tebilang ditu, kemari.

Apin lama ti udah, iya mega udah bejadika siti pelasar ti sama ngagai Opis Kereja Raya (JKR) Sarawak iya nya JKRDash dikena matau projek ke udah tauka apin dipejalai.

“Nengah pelasar tu, aku empu ulih meda pejalai projek nya lalu enti sema projek nya bisi penanggul tejanggal, kitai ulih ngiga chara dikena mutarka penanggul nya enggau jampat.

“Pia mega enggau Opis Tanah enggau Survei ke udah bisi Lasis ti ulih dikena ngiga blok tanah tauka pekara bekaul enggau tanah di nengeri tu,” ku iya.

Ba lansa ke sama, Abang Johari mega madahka guna teknologi ba pengawa nyaga pengelikun ba genturung pendiau dipegai DBKU.

“Ba endur ti udah ditemu balat penanggul, kitai tau ngengkahka CCTV lalu nya deka matau pekara ti nyadi ba endur nya.

“Tu reti iya, semua pekara diatu tau dikumbai kitai infomasyen pintar laban ngena teknologi lalu tu mih pekara ti patut dipejalaika DBKU,” ku iya nambah.

Rambau pengawa nya, Abang Jo mega bejadika Kalendar Aktiviti 2020 DBKU sereta ngemataka pengawa nyain Sempekat Pemereti Ati (Mou) entara DBKU enggau Centexs sereta tiga kompeni bukai (Zecon Berhad, Maltimur Resources Sdn Bhd enggau Rafulin Holdings Sdn Bhd).

Tuju Mou DBKU enggau Centexs iya nya meri peluang ngagai pelatih bejalaika latih sida di Centexs dikena nambahka pengelandik teknikal, pengawa makit lalu nambahka ekonomi komuniti bekaul enggau DBKU.

Kelimpah ari nya, kerejasama DBKU enggau tiga kompeni bukai nya bekaul enggau program anak angkat dikena ngemanahka rampa tisi jalai nyengkaum jalai puntang Datuk Menteri Abang Haji Mohammad Zin Bin Haji Salleh enggau jalai puntang Tun Salahuddin ti disadang deka bejalai berengkah bulan March ngagai Ogos 2020.