BALAI RINGIN: Parti Rayat Sarawak (PRS) endang semampai ngelaluka sebarang kaban politik ari piak penyakal nyengkaum PKR tauka DAP ke udah asa enggau perintah PH sebedau tu lalu bisi ati pulai baru ngagai parti tu.

Ketuai Nembiak PRS Datuk Snowdan Lawan madah dalam dunya politik enda selama iya kitai nyadi kaban lalu enda selama iya orang nya nyadi munsuh.

“Baka nya mih dunya politik enda selama iya kitai bekaban lalu enda selama iya orang nya nyadi munsuh, tu mih dikumbai kitai politik pemansang. Pintu PRS endang semampai tebuka ngagai semua.

“Nya mih utai ke pemadu beguna laban kitai deka ngatur pemansang ba menua enggau bansa kitai,” ku iya seraya madah kitai di Balai Ringin ditu meseti naka ulih segulai sejalai enggau pangan diri ke pemaik menua.

Iya madah munyi nya rambau Program Randau Ruai GPS begulai enggau YB Datuk Snowdan Lawan diatur JKKK enggau Gerempung Indu Kpg Danau Melikin bepalan ba Rumah Kaunselor Philip Langit di Danau Melikin ditu, kemari.

Berebak enggau nya, iya madah penanggul ke ditapi di Balai Ringin iya nya bisi dua pekara, kesatu sida ari parti penyakal baka PKR, DAP enggau parti bukai ti nguji deka ngelaban kitai.

“Taja pia, nya endang udah adat iya laban kitai di Malaysia tu ngemeranka atur demokrasi barang sapa ulih betanding, aku enda nganu orang laban pengawa nya tebuka.

“Pia mega dalam mayuh kitai ti begulai ditu mega sama, suba bisi kita nya ngelaban aku tang nadai ngawa, laban nyangka nya dikena kita berunding tauka berati ni bagi pengari rayat ke beamai-amai nulung enggau ngemansangka menua kita,” ku iya.

Ba pengerami nya, Snowdan bisi nyuaka kad kaban PRS ngagai Kaunselor Nyutan ti ngarika kaban PRS ari Kpg Tekalong enggau TR Miri ti ngarika kaban PRS ari Kpg Sengkunjang Baru enggau Kpg Ruan Baru, Simunjan.

Nangkan nya, Snowdan mega nerima pom peminta nyadi kaban PRS ari Kaunselor Bessi ari sitak Bayor Tembawai enggau Kaunselor Marylin ari Munggu Ubah, Pantu.

KABAN BARU…Snowdan (kanan) nyerahka kad kaban baru PRS ari Kaunselor Nyutan seraya dikemataka Kaunselor Philip Langit.