BALAI RINGIN: Bala tuai rumah lebih agi ba sitak Balai Ringin dilalau ngambi lebih regas ngenataika peminta ungkup pemansang rumah panjai.

Menteri Muda Nembiak enggau Lumba Datuk Snowdan Lawan madah laban ke nyadi tuai rumah, sida tu patut ngembuan penemu ke mayuh dikena ngemansangka rumah panjai diri.

“Enti tuai rumah enda regas nyadi rumah panjai nya tentu tusah deka mansang.

“Nya alai aku nesau semua tuai rumah patut angkat, betanya lalu betemu enggau pemesai opis kunsil, minta penerang ungkup rumah panjai anang enda regas,” ku iya.

Iya madah munyi nya rambau Program Randau Ruai GPS begulai enggau YB Datuk Snowdan Lawan diatur JKKK enggau Gerempung Indu Kpg Danau Melikin bepalan ba Rumah Kaunselor Philip Langit di Danau Melikin ditu, kemari.

NAMA BERITA?…Snowdan betabi enggau mensia mayuh ti ngambat penatai iya rambau Program Randau Ruai GPS di Rumah Kaunselor Philip Langit di Kpg Danau Melikin, kemari.

Balai Ringin tu chukup mayuh rumah panjai iya nya bisi 225 buah genturung pendiau lalu ngarapka bala tuai rumah meseti landik ngiga awak betemu enggau aku lalu ngenataika tauka nandu peminta diri, ku iya.

Kebuah pia, laban tuai rumah endang jematan pengari rayat ngelala penanggul ke bisi ditapi rayat mayuh ba renggat baruh. Pia mega aku nyadi jematan endur rayat ngenataika peminta ngagai perintah.

Berebak enggau nya, ku Snowdan, tuai rumah besai amat tanggungpengawa laban sida udah dipilih peranak rumah panjai mangku pengawa nya.

“Tuai Rumah mega enda tau jauh ari pengari rayat ti nyadi jematan ngulihka penerang enggau bantu ungkup nembiak redak.

Kelimpah nya, tuai rumah mega meseti nemu ngatur rayat ba rumah panjai enggau manah, nya kebuah kitai deka JKKK genap rumah panjai meseti nganjung ripot baum abis nadai enam kali setaun,” ku iya.

Nangkan nya, Snowdan madah bisi sekeda projek pemansang ke udah digaga ba sitak Balai Ringin nyengkaum Jematan Pantu beungkus RM20 juta, Jalai Kedumpai nyentuk ngagai Sungai Indai Sega beungkus RM12.5 juta, Jalai Muding beungkus RM2 juta enggau Mini Stadium Balai Ringin ti betikas entaranbasa beungkus RM10 juta.

Pia mega, iya madah Balai Ringin diperambu deka dipinta nyadi sebuah pelilih mit laban enti udah nyadi pelilih mit ila iya deka bisi agih belanja kediri dikena ngaga pemansang ditu.

Tu beduduk ari Pelilih Pantu ke udah kelalu lama nyadi Pelilih Mit nyadi deka dipinta kitai nyadi siti pelilih penuh ngambika bisi siku Pemesai Pelilih (D.O) dichiri ba endur tu.

Adun Balai Ringin tu mega ngelansa pasal projek ngaga tiga buah jalai alun ke bepun ari Kampung Tuba, Muding, Mentu nyentuk ke Sungai Indai, ari Batang Seterap, Semawa nyentuk ke Kampung Sapak enggau ari Kampung Empaling nyentuk ke Kampung Gayau.

“Dua hari sebedau bejadika GPS di Pasar Lachau, aku empu bisi betemu enggau Kepala Menteri (Datuk Patinggi Abang Johari Tun Openg) pasal tiga buah jalai alun tu ke beungkus RM394 juta.

“Kepala Menteri udah madah iya setuju meri agih belanja dikena ngaga jalai alun tu. Agih belanja ke pemadu besai tu iya nya ari Kampung Tuba laban ngembuan pemanjai jalai urung 70 kilometer lalu beungkus RM263 juta,” ku iya.

Ku iya mega, pengawa ngaga jalai alun tu deka dipejalaika berenggat-renggat dalam timpuh lima taun.

“Aku ngarap lebuh piak perintah ngemujurka pengawa ngaga jalai alun tu ila, kita rayat patut meri kerejasama,” ku iya.

Ba program nya, Snowdan bisi ngagihka bantu penyampau RM89 ribu ngagai JKKK sereta Gerempung Indu enam buah rumah panjai ke besemak.

Iya mega madahka berita madah bekaul agih belanja udah dikemendar dikena ngaga Balai Raya Kpg Danau Melikin enggau Gelanggang Futsal ungkup raban nembiak di Melikin.

Pekara bukai iya madah deka berunding enggau piak bekaul sentang peminta ngaduka tiang pemachar telekomunikasi ke patut didiri di sitak Melikin.

Sama datai Pemancha Peter Moni, Penghulu Peli ari Batang Kanan, Simunjan, bala kaunselor-kaunselor, raban tuai rumah enggau rayat mayuh ke diau besemak.