KABONG: Rayat sitak Kabong ngarapka Kaban Parlimen Saratok Ali Biju ti dichiri nyadi kaban Kabinet Perintah Besai ke baru ulih mai mayuh agi pemansang ngagai menua nya.

Adun Kabong, Mohd Chee Kadir meri tabi puji ngagai Ali ke dilempaika pengandal nyadi Sapit Menteri Kuasa Enggau Pengeraja Asal.

Iya madahka diri berasai lantang ati laban andalka Ali ulih gawa enggau ngerumban pemansang baka nyendiaka penyikap perengkaguna pemun dia.

“Kitai sama nemu, rayat ditu agi randakka pemansang ke alai sitak Kabong sebagi ari Dun di baruh Parlimen Saratok begulai enggau Krian sereta Kalaka.

“Nya alai, bisi pengari ba Putrajaya ti dipadu nyadi sapit menteri, kami ngarapka iya ulih mantu rayat Dun Kabong ditu, mai mayuh agi pemansang.

“Iya (Ali) ulih mai peminta rayat ngambika sambung bekal ai, kuasa karan enggau ke bukai ngagai peranak rumah panjai enggau genturung pendiau ditu ulih dirumban,” ku Chee Kadir andal.