KUCHING: Cuepacs Nengeri Sarawak (CNS) ngarapka pengawa nyiri kaban parlimen ari Sarawak dalam kabinet baru ulih mai pemansang enggau transformasyen ba menua tu.

Presiden CNS Ahmad Mahlie madah, sida ngarapka pekara nya ulih jampat dipejalai ngambi ulih mai pemaik ngagai anak Sarawak.

“Berebak enggau nya, kami meri tabi puji ngagai kaban parlimen ari Sarawak ti udah dichiri nyadi menteri kanan, menteri penuh enggau sida ti megai tanggungpengawa nyadi sapit menteri,” ku iya madah ba siti penerang berita, kemari.

Nangkan nya iya mega meri tabi puji ngagai Menteri Besai Tan Sri Muhyiddin Yassin ke udah mujur numbuhka kabinet baru dikena napi pemar global sereta politik menua.

“Kami mega meri tabi puji ngagai kaban parlimen enggau senator ke baru dichiri megai tanggungpengawa nyadi menteri penuh enggau sapit menteri dalam kabinet baru tu.

“CNS ngarapka nengah rintai kabinet baru tu, nasip rayat dijaga enggau penuh integriti, lurus sereta meruan kelebih agi pengereja pengawa perintah,” ku iya nerang.