KUCHING: Perintah Sarawak nesau bala kaunsilor komuniti menua tu enggau entarabansa mantaika keretas jurai enggau poster maya Konvensyen Kaunseling Entarabansa 2020 (ICC2020) deka diatur berengkah ari 10 ngagai 13 Ogos ba sebuah hotel tebilang ditu.

Batang tuju konvensyen tu nempa mayuh agi komiti kaunsilor menua tu chakah ngaul diri enggau komuniti, ke alai ICC2020 melaba nerima urung 800 penyereta ari selampur dunya.

Bejaku ba aum pemberita ICC2020, Sekretari Perintah Nengeri, Datuk Amar Jaul Samion, madahka semua keretas jurai ti diterima maya nya ila deka diberi peluang ngambika dichelak ba ISI, SCOPUS tauka Jurnal.

“Kami meransang bala kaunsilor komuniti dunya nyengkaum bala pengelicha, pengajar kaunsilor, kaunsilor sekula, kaban psikologi, pengemeran pengerai runding, lutur perubat, pakar perubat, psikiatri enggau psikologi klinikal.

“Sida ke diperansang datai nyengkaum pemesai rama, raban bepenemu, nembiak tertiari, pengajar, pakar motivasyen, ejensi perintah enggau peribit sereta gempung ukai dikuasa perintah (NGO) mantaika keretas jurai,” ku iya.

Jaul madah, tu keterubah menua Kuching nyadi palan ngatur konvensyen baka nya.

“Randau deka diatur kena nyendiaka diri ngatur konvensyen tu, ngaul bala bakih kunsi kerejasama kami baka Serakup Kaunseling Malaysia Entarabansa (PERKAMA), Serakup Entarabansa Ungkup Kaunseling (IAC) enggau Universiti Malaysia Sarawak (Unimas).

Barang sapa ke bisi ati tauka deka nemu penerang silik tau ngelawa website www.icc2020.my tauka e-mel secretariat@icc2020.my.