KUCHING: Jaku dipansutka Kaban Parlimen Sri Aman Datuk Masir Kujat madahka diri bisi nerima peminta mangku pengawa ba tusun kabinet baru semina jaku manis aja.

Ketuai Komuniti Iban Simunjan Pemancha Peter Mooney madahka sida enda pechayaka Masir ti madahka diri enda nerima peminta ari Menteri Besai Tan Sri Muhyiddin Yassin kelai iya enda ngembuan runding ti tegap.

“Sapa iya ba mata Menteri Besai lalu sapa ke deka arapka pengari rayat ke suah engkejuk?,” ku iya ba siti penerang kemari.

Ku Pemancha Peter, nya semina jaku manis iya minta penyinu ngagai rayat tang rayat chukup asa laban udah milih iya nyadi pengari rayat menua nya.

“Iya mega madahka diri penuduk Menteri Besai enda tegap tang iya enda nemu penuduk iya di Sri Aman pen beguyat,” ku iya.

Pengari Genturung Pendiau Iban Pantu, Penghulu Limi lebuh nimbal Masir madahka jaku nya semina minta penyinu sereta nutup runding rayat sitak nya.

“Pengelama tiga taun Sri Aman dipegai iya (Masir), nadai pemansang nyengenda dipeda dibai ngagai menua tu.

“Kami ngasaika diri udah dikelakar kelebih agi pengudah iya ninggalka Gempung Parti Sarawak (GPS) taja kami udah bebendar mantu iya bulih menang majoriti di Sri Aman,” ku iya.

Pemancha Peter Mooney

Penghulu Johnny Limi