BETONG: Menteri Muda Infrastruktur enggau Pemansang Palan Penyangkai Kapal Datuk Julaihi Narawi madahka chara besaup meri melanja 50:50 dikena ngaga projek Jematan Batang Lupar nya endang tanggungpengawa sereta hak Perintah Besai ngagai Sarawak kelebih agi bekaul perengkaguna rayat menua pesisir.

Iya enda nulak Perintah Sarawak bisi perambu pasal chara tu dikena ngulihka baru utai ke udah dikinsil Pakatan Harapan (PH) suba lebuh merintah.

Ku iya, betukar Perintah Besai baru tu deka meri penampak baru ngagai Sarawak.

“Suba, Jematan Batang Lupar disetuju ungkus nya dipelanja bekunsi entara Perintah Besai (Barisan Nasional) enggau Perintah Sarawak ngena chara bayar 50:50.

“Tang ketegal betukar perintah kena bulan Mei 2018 pengudah dipegai PH, sida udah nginsil pekara ke udah dipesetuju nya.

“Nya kebuah, udah tentu kitai bisi perambu kelebih agi lebuh Perintah Besai ti ditumbuh nengah Perikatan Nasional +Gempung Parti Sarawak (PN +GPS) enggau kitai bisi Menteri Kanan enggau Menteri Kereja Raya dichiri ari anak Sarawak iya nya Kaban Parlimen Petra Jaya Dato’ Sri Fadillah Yusof.

“Kitai enggau naka ulih deka ngelimatka belanja laban kitai pen dekaka hak kitai ngulihka belanja ari Perintah Besai.
“Aku ngasaika pengawa ngaga baru Jematan Batang Lupar tu sebagi ari hak kitai ke patut dipulaika baru,” terang iya.

Julaihi ti mega Adun Sebuyau mansutka jaku nya pengudah ngabas taba ngaga Jematan Sungai Krian, ditu ensanus.

Terang Julaihi, pengawa ngaga jematan nya udah dikemendar sebedau Pengawa Bepilih Besai (PRU) Ke-14.
“Pengawa ngemendar tu ungkup pengelantang rayat ba sitak menua pesisir enggau sitak menua ulu lalu rayat endang ngarapka pekara tu nyadi nyata,” tandu iya.

Julaihi madahka Jematan Batang Lupar pemanjau 5.1 kilometer deka ditinda enda lama agi enggau diatu udah ba renggat kepenudi nyendiaka langkar tengkebang kelimpah nyadi jematan pemadu panjai ba menua tu.
Taja pia ku iya, jalai nuju ngagai taba kededua belah jematan nya udah berengkah dirata.

Ba lansa bukai, iya madahka Bagi Menua Betong dalam kandang lima taun deka ngembuan tiga jematan baru kelimpah ari Jematan Batang Lupar.

“Dua ari nya udah berengkah dipejalai ba taba iya nya Jematan Batang Saribas (RM375 juta) enggau Jematan Sungai Krian (RM75 juta).

“Jematan Sungai Krian pemanjai 690 meter disadang tembu dalam kandang 36 taun lalu jematan nya diatu udah nyapai lapan peratus digaga.

“Nangkan nya, Jematan Batang Saribas disandang tembu dalam kandang 48 bulan enggau diatu benung chara dipejalai pengawa ngupas taba nya.

“Jematan Muara Batang Saribas (sepiak ulu Kampung Spinang) digaga ungkup Jalai Besai Kedua enggau belanja udah dikemendar sereta projek deka ditinda taun tu,” terang iya.

Kepala Menteri disadang deka bejadika pengawa nasih tanah ngaga Jematan Sungai Krian kena 4 April tu.
Sama datai Adun Kabong Mohd. Chee Kadir, Adun Saribas Mohammad Razi Sitam, bala Sekretari Politik Kepala Menteri, Penulung Direktor Unit Protokol enggau Pengatur Pengawa Sarawak Salleh Sani, Residen Bagi Menua Betong Friday Belik, Injinir Unit JKR Bagi Menua Betong Chiresly Francis Kureng sereta pemesai opis bukai