SIBU: Kort Tinggi ngeletak ukum gantung mandatori ngagai siku deriba lori ti ditemu salah munuh siku pemantu rejister ba Opis Pengerejsiter Bansa (JPN) ditu kena 2 Ogos 2018.

Akim Lim Hock Leng netapka pemutus nya ngagai Philip Uja, 44 taun, pengudah piak bedawa mujur mantaika bukti kes ngagai orang dituduh.

“Pengudah berundingka semua pekara enggau bukti, nyengkaum bukti ari deriba Grab, panjung, telefon enggau marik niang ti digadai sereta nguji munuh enggau ke bukai, enda ulih dikenggai piak bedawa mujur mantaika bukti kes ngagai iya ke dituduh nitihkaSeksyen 302 Kanun Keseksaan.

“Berindik ari nya, orang ke dituduh udah ditemu salah munuh Nurnia Azale Priscilla Edward.

Nitihka Seksyen 277 Kanun Acara Jenayah, iya ke dituduh tu deka digantung mandatori,” ku iya lebuh macha pemutus kes kena Hari Tiga tu tadi.

Nitihka utai dituduh, Philip didawa munuh Nurnia Azalea entara pukul 8 malam kena 1 Ogos 2018 ngagai 2.30 lemai kena 2 Ogos 2018 ba sebuah bilik suwa di Jalai Tiong Hua.

Ba tuduh nya, iya didawa nitihka Seksyen 302 Kanun Keseksaan ti mai ukum mati mandatori enti ditemu salah.

Philip diarika luyar ti dichiri Rosli Gapor seraya dawa dipejalaika Sapit Pendawa Raya, Mohamad Arif Aizuddin.