BINTULU: Nembiak rebak baru dilalau nerebak ulahh integriti ba diri empu dikena napi pemar ba jeman kereja dudi hari.

Ku Menteri ba Opis Kepada Kementeri (Integriti enggau Ombudsman) Datuk Talip Zulpilip, tiap-taip iku nembiak kelebih nembiak sekula enda tau enda ngumbuan juluk ati laban nya ulih mai sida nuju jalai pemansang dalam pengidup.

“Bisi tiga bengkah utai ke di kira lebuh ke ngambi orang ke nyadi pengereja pengawa iya nya keterubah pengelandik, kedua pemandai enggau ketiga integriti,” ku iya.

Iya mansut ke jaku nya lebuh ke bejadi Jerayawara Project Of Dreams Realized (PRO-DR): Jelajah Pendidikan dan Kerjaya Siri ke-6 2020 bepalan ba siti hotel ke tebilang di Bintulu, kemari.

Lebuh ke bejaku iya ngelalau nembiak ngasuh sida nyulut agi ba pelajar sida lebih agi ba Pelajar enggau Latih Teknikal enggau Vokasional (TVET).

Talip ke mega nyadi Kaban Kunsil Negeri (ADUN) Jepak madahkan Perintah Menua beguna ke orang ti bisi integriti lebuh ke nyadi pengereja pengawa baik nya ba opis-opis perintah tauka kompeni.

“Enti nadai integriti lebuh maya megai pengawa, sigi anchur menua kitai lalu sigi enda ulih maju,” ku iya.
Nangkan ke nya, Talip ngelawa mensia mayuh mega ngambil ke sida semampai rajin sereta gawa enggau bebendar.

Berebak enggau nya Ketuai Operasi Tabung Ekonomi Gagasan Anak Bumiputera Sarawak (TEGAS), Fredick Kevin Anak Buseli lebuh ke bejaku, tuju ke bendar program nya di mantu nembiak ke udah nembu ke pelajar ba tikas Sijil Pelajaran Malaysia (SPM), Sijil Tinggi Pelajaran Malaysia (STPM) enggau ba palan pelatih pelajar tinggi nentu ke kuing tuju sida lebuh ke begiga ke pengawa.