SIBU: Dara bajik bansa Dayak agi rumpas beumur 18 ngagai 30 taun diperansang nyereta Pekit Kumang Gawai Dayak renggat Bagi Menua Sibu.

Nitihka penerang, pekit pemajik gamal diatur kena 23 Mei ba Ringkat 6, Hotel Kingwood ditu berengkah ari pukul 7 malam.

Pekit diatur beserimbai enggau Pengerami Makai Lemai Mantar Gawai Dayak Sibu 2020 diatur Serakup Indu Dayak Sarawak (SIDS) Sibu enggau kerejasama Serakup Bansa Dayak Sarawak (SDNU) Sibu, SDNU Rejang, SDNU Sibu Jaya enggau Serakup Bansa Orang Ulu (OUNA) Sibu.

Chairperson Komiti Pengatur Pekit, Senorita Salleh, madahka pekit tu ulih disereta semua dara bajik bansa Dayak enggau agi rumpas.

“Sida dipinta mayar RM30 lebuh nyereta pekit tu enggau semua ungkus pekit nya meseti ditanggung penyereta empu.

“Pia mega, bala penyereta meseti ngembuan peninggi enda kurang ari 5 kaki 2 inchi,” terang iya.

Pom meseti disempulang enggau bayar panjar penyampau RM30 (enda dipulaika baru) lalu dianjung ngagai piak pengatur sebedau tauka enda taun enda kena 8 Mei tu.

Senorita mega madah, renggat milih deka diatur sekalika 9 Mei tauka 10 Mei enti sema penyereta ti ngambi bagi ba pekit tu ngelui ari 12 penyereta.

Penerang silik tauka sida deka ngambi pom tau telefon ngagai Senorita ngagai lumur 013-8061265, Claudia Dieo (014-6526083) tauka Rose Chukan (013-8313990).