KUCHING: “Aku gerai enggau nadai nama-nama,” ku Chairman Parti Keadilan Rakyat (PKR) Sarawak Larry Sng nengah laman Facebook iya, kemari.

Penerang dibantai Kaban Parlimen Julau nya bekau ari siku pengari rayat dikenuku kena penyakit Covid-19 pengudah ngulu aum begulai enggau iya dalam kandang dua minggu ke udah.

“Nasib amat aku nadai bejaku sereta betabi enggau iya lalu nadai ngelawa Kaban Parlimen ke sakit nya,” ku iya.

Nya alai, dikena nyeliah ari penyakit tu, Larry madah enda ngulu sebarang program dalam timpuh dua minggu tu di Julau.

Iya mega madah deka nyeliah diri ari ngulu pengawa begelumur sereta matau pekara baru pasal kes Covid-19.

“Aram kitai bela besampi-awakka semua sida nya selamat,” ku iya.