SAMALAJU: Rayat menua pesisir lebih agi ba sitak sitak Samalaju, ditu patut ransing besemekih ngemansangka pengawa betanam betupi chara moden.

Kaban Kunsil Negeri (Adun) Samalaju Majang Renggi madahka ngena chara nya ulih nyungkak ke penatai pemisi rayat rumah panjai ba endur tu.

“Diatu tanah ke dikembuan kitai kelebih agi ba Bintulu-Similajau tu udah enda belemak agi, udah kusi enggau nadai mega tentu besai”.

“Nya kebuah aku ngansak kitai sama ngemeran ke chara baru kelebih agi dalam ngemansangka pengawa betanam betupi moden,” ku iya.

Majang mansutka penemu nya ba pengerami Ketuai Begulai enggau Rayat ba Rumah Bekar Anak Minggu, Batu 28, Jalai Bintulu-Miri, kemari.

Ku Majang, peranak rumah panjai mega diasak ngambi peluang beduduk ari Samalaju ke nyadi sida palan industri ke maju di menua tu.

“Mayuh orang datai napatka kitai Samalaju ketegal ke gawa ba industri baik nya ba Kidurong enggau Taman Perindustrian Samalaju (SIP) ke berimbai pendiau enggau kitai ditu,” ku iya.

Nya kebuah, kelimpah ari nyereta orang gawa ba industri dia, Majang besai bendar pengarap ati peranak sitak tu ulih berundingka jalai dagang ti bepelasarka asil utai tanam enggau utai tupi.

“Tu dikena napi orang ke mayuh datai napat ke endur kitai ditu lalu kitai nyamai nyual ketegal jalai alun menua kitai ditu udah nyamai,” ku iya.

Beduduk ari nya Majang mega ngasuh apai indai semampai ngempit kaul sida enggau sekula dikena mekal anak enggau latih sereta pelajar ke chukup.

“Ari pelajar ke chukup enggau latih ke chukup anak kitai ulih napi pengawa ke bisi ba industri ditu,” ku iya.

Sama bela bisi datai ngulu pengerami nya, Penghulu Man Imbak, bala opis-opis perintah enggau bala Tuai Rumah ke besemak pendiau enggau rumah panjai nya.