SIBU: Perintah Sarawak deka bekerejasama enggau semua sepital swasta di selampur Sarawak bejalaika ‘Contingency Plan’ nagang pengerekai igi penyakit Covid-19.

Chairman Komiti Penyanga Penusah Ngenyit Nengeri (JPBN) Datuk Amar Douglas Uggah Embas madahka iya udah ngaga siti aum begulai enggau pengari ari sepital swasta di Kuching kenaka Hari Enam tu tadi.

“Pekara tu ngambika kitai ulih nemu baka ni sida ulih mantu enti sema kitai begunaka mayuh endur dikena mindahka sida ke sakit tang nadai Covid-19 ari empat sepital besai ke udah ditetapka ungkup Covid-19.

“Empat sepital nya Sepital Besai Sarawak di Kuching, Sepital Sibu, Sepital Bintulu enggau Sepital Miri.

“Kami benung berunding enggau semua sepital swasta di Sarawak ngambika nyikap diri napu sebarang pekara ti disasanv nyadi ari igi penyakit tu,” ku iya madah ba aum pemberita pengudah nemuai ngagai Kem Belia Kemuyang ditu ti deka nyadi palan kuarantin Covid-19 ditu, kemari.

Bela ngiring pengawa nemuai nya Sapit Menteri Pengerai II Datuk Aaron Ago Dagang, Menteri Muda Pengawa Berumah enggau Kaunsil Kandang Menua Dr Annuar Rapa’ee, Sapit Sekretari Perintah Nengeri Datuk Ik Pahon Joyik, Direktor Opis Pengerai Nengeri Sarawak (JPNS) Dr Chin Zin Hing, Pemesai Pengerai Bagi Menua Sibu Dr Teh Jo Hun enggau bala bukai.

Uggah ti mega nyadi Sapit Kepala Menteri madahka atur ungkup empat sepital nya udah ditetapka ngambika nyikap diri enggau pekara ti patut.

“Bala pemesai pengerai ba sepital nya benung bejalaika latih ngenyit diatu ari sukut endur sereta kereban ngambika kitai ulih napi sebarang pekara ti deka nyadi berindik ari igi penyakit tu,” ku iya madah nyemetak.

Ngelansa pasal palan kurantin di Kuching, Sibu, Bintulu enggau Miri, iya madahka pelin udah diperambu sebulan ke udah.

“Tu sebagi ari pekara ti patut ba pengawa kitai mutar kes Covid-19.

“Kami udah netapka palan kuarantin di Kuching,” ku iya.