SIMANGGANG: Chalun Parti Sarawak Bersatu (PSB) sitak Kunsil Nengeri (Dun) Simanggang Wilson Entabang madah iya deka fokus ba pekara pemansang ekonomi rayat nyema pengundi milih iya ba Pengawa Bepilih Nengeri (PRN) deka datai.

“Aku deka fokus ngagai pengawa ngangkatka pemansang ekonomi rayat ditu (Simanggang),”ku iya nimbal enggau jaku pandak lebuh dirandau Suara Sarawak.

Wilson asal ari Bayai baru aja pinchin nyadi Sapit Direktor Opis Betanam Betupi udah dikenuku Presiden PSB, Datuk Sri Wong Soon Koh nyadi chalun ungkup Dun Simanggang nengah sebengkah aum pemberita ke diatur di Indu Opis PSB di Pending, lemai kemari.

Kenu ku Soon Koh ke mega ex-Menteri Wang, PSB sebengkah parti pupu bansa ti deka negika pengawa ti adil ngagai semua.

Ungkup penemu PSB bisi ngerintaika lapan pekara besai ti deka digaga nyema mujur nyadi perintah udah tu ila.

Entara nya, negika hak-hak Sarawak, ngemanahka pelajar, ngaduka servis pengawa perintah, nusun baru pemansang ba kandang mengeri, ngatur belanja enggau manah, ngemansangka pengawa betanam betupi, dagang temuai sereta ngaduka transformasyen menua pesisir.

Pia mega, PSB dela fokus ngagai pemansang raban nembiak, rumah ulih dibeli, pengerai mensia mayuh, hak bekaul enggau tanah, pemansang orang gawa, perengkaguna lumba sereta mayuh agi sektor bukai.

Kelimpah ari DAP, PSB dipelaba entara parti kuat ti deka disatup GPS ba PRN tu ila. Nyadi tu deka ngemataka pengawa berebutka penuduk deka angat ba sekeda sitak ke majoriti China di mengeri enggau sekeda penuduk majoriti Dayak di menua pesisir.

Naka tu, PSB udah mantaika nama chalun ungkup sitak Dun Balai Ringin, Opar, Tasik Biru, Engkilili, Batang Ai, Bawang Assan, Dudong, Tamin, Muara Tuang, Marudi enggau Lingga.