KUCHING: Kaban Parlimen Sibu Oscar Ling Chai Yew minta peranak Sibu anang kelalu irau berindik ari stok sengkabung mua enggau sanitizer jari ke udah abis ba pasar.

Ba sebengkah penerang media kemari, Oscar madahka stok udah abis nya ketegal pengerekai igi penyakit Covid-19 lebuh ba Sarawak udah bisi kes positif kelebih agi ba Sibu.

“Naka 15 March tu tadi, Sarawak udah bisi 11 kes positif igi penyakit Covid-19 enggau semua nya udah dikuarantin ngambi diperubat

“Aku ngelalau peranak Sibu sama nyaga pengerai diri, lebuh begulai enggau orang bukai sereta anang ngelawa palan ti mayuh orang begelumu,” ku iya.

Nambahka nya, iya mega nangkan mensia mayuh suah agi masu jari enggau sabun sereta nitihka atur perintah ngambi nyeliahka diri ari dirampit igi penyakit tu.

“Peranak Sibu mega anang arapka berita bula baka perintah bekurung ke udah ngerembai sebelah media rama nya.

“Semampai ngulihka penerang pemadu baru ari media ke betul ngambika kitai enda irau,” tandu iya.

Nambahka nya, iya ngarapka peranak Sibu sama nyaga pengerai diri ngambi nagang pengerekai igi penyakit Covid-19 laban kes tu majak ngaul mensia mayuh.

“Enti sema bisi peranak Sibu bisi kaul enggau pesakit ti dipelaba dirampit penyakit tu, dikearap sida telefon ngagai Sepital Sibu ngambi beperesa pengerai enggau mendingka jaku pakar perubat pengudah beperesa.

“Aku empu udah 14 hari ngurung diri pengudah bejaku enggau Kaban Parlimen Sarikei, Wong Ling Biu.

“Taja aku udah ngurung diri lebuh ari ditetapka KKM, tang aku agi ngurung diir nyentuk ripot Covid-19 aku udah pansut,” ku iya.

Kelimpah ari nya, iya nangkan peranak ba Sibu beperesa pengerai ba Sepital Sibu ngambi nagang pengerekai igi penyakit enti bisi asai tabin, batuk, sendat seput enggau baru pulai ari menua ditemu bisi kes tu.